Oncan mihtoa miyec tlamantli in inpan mochiuh
in ayamo hualhui españoles in nican tlalli ipan,
in ixquichica onpohualxihuitl ommatlactli.
In ipan xihuitl 1519 icuac quizaco in capitan don hernando cortes
Cenca miyec in acalli hualla in oncan hualyetiyaque in españoles in yaoquizque
Auh in oiuh quima in yehuatl motecuzoma,
Niman tlaihuayaque in ititlanhuan
Auh in quitquique in tetlapaloliztli cenca miyec
Ihuan cenca tlazohtli in tlatquitl.
Auh momatque, ca yecatl in quetzalcoatl ohualla
Auh in icuac oahcito niman mochi quimamacaque in quitquique tetlapaloliztli
In yehuatl capitan don hernando cortes
Auh in icuac ye calactihuitze, in yehuantin españoles
Niman quiyaonamiquito, in tlaxcalteca, imotonhuan
Amo zan quexquichtin, cenca miyequintin, ic oquimicalque
Oquinyaochiuhque, in españoles
Auh mochintin, micque in tlaxcalteca imontonhuan
quinmictique , in españoles: ic cenca momauhtique, in tlaxcalteca
Auh in yehuantin, in tlaxcalteca, nimanic tlaihuaque, quinmacato in tlacualli
In ixquich intech monequi: ihuan quinpaccatlapaloto: ihuan quinhuicaque
Auh zan quezquilhuitl, in oncan motlalique, mocehuique, in yehuantin españoles
Auh in yehuantin, españoles niman yaque in ompa cholollan:
Oncan miyequintin, quinmictique, in chololteca
Auh in icuac, oiuh quicac, in yehuatl motecuzoma, cenca momauhti
Ihuan in ixquichtin, in tenochca cenca momauhtique
Ic oc ceppa tlaihua, in yehuatl motecuzoma yehuantin in quimihua in tetecuti
In pipiltin, quinnamiquito, in capitan, don hernando cortes,
Cenca miyec, in quitquique, in teocuitlatl.
Auh oncan in quinamiquito, in itzalan popoca tepetl
Ihuan in iztac tepetl, in motenehua ithualco
Oncan quinonotzque, quimacaque in itlatol, in ita motecuzoma
Ihuan quimacaque in ixquich intetlapaloaya inin tetech ahciya,
in teocuitlatl, ihuan oc cequin.
Auh zan huallamelauh, in nican Mexico, inic ahcico in yehuatl
Don Hernando Cortes, Zan hualmoyaochichiuhtia, auh in motecuzoma,
ompa in quinamiquito in caltenco, in ompa xolloco,
Zan quipaccanamiquito: ihuan quitlatlauhti,
quitlapalo in Capitan Don Hernando Cortes,
Niman quihuicac in ompa huey tecpan oncan motlalique, in ixquichtin españoles
Auh in iquezquilhuiyoc, in yehuatl capital oquilpi in motecuzoma:
Auh in icuac oahcico tlatolli, in ompa atenco,
inic oc centlamantin oahcico españoles: in yehuatl capitan oquinnamiquito,
Cequintin quinhuicac españoles ihuan nican tlaca:
Auh nican quicauhtia in don pedro alvarado,
ihuan oc cequintin españoles in tecpan tlapiyaya
Auh in icuac in oquiz ilhuiuh huitzilopochtli, in yehuatl don Pedro Alvarado
Ihuan in españoles in itlan catca, miyequintin, quinmictique in mexica
In quilhuiquixtiliaya Huitzilopochtli, ic ompeuh in yaoyotl.
Auh in icuac in ohualmocuep, in capitan, in ompa atenco
Miyequintin, quinhualhuicac españoles, amo ic motlacahualtique in mexica
Auh in ipan xihuitl 1520 icuac omic in motecuzoma,
auh in yehuantin españoles Oquizque tlaxcallan yaqueh
auh huey cocoliztli mochiuh in nican mexico
Zazahuatihuac: ihuan cenca miyequintin micque, in nican tlaca.
In ipan xihuitl 1521, oc ceppa huallaque in españoles,
ompa omotlalique, in tetzcuco,
huecauhtica quinyaochiuhque, quimpeuhque, quimicalque, in mexica.
In ipan xihuitl 1522, oc ceppa hualmonechicoque, hualmocentlalique in mexica:
In moyaohuaca in xitinca in ipampa yaoyotl
icuac ahcico in matlactin omomen santo francisco padreme
In quintlaneltoquilique in nican nueva españa tlaca.