Florentine

Ic Chicuacen Capitulo

Oncan mihtia in nez, in mottac, in machiyotl, ihuan in tetzahuitl

In ayamo hualhui espanoles in nican tlalli ipan,

Ihuan in ayamo iximachoya, in nican chaneque

In ayamo huallahci espanoles, oc matlacxihuitl:

Centlamantli tetzahuitl achto nez ilhuicatitech

Iuhqui in tlemiyahuatl, iuhquin tlecuezallotl,

Iuhquin tlahuizcalli pipixauhticaca,

inic neciya iuhquin ilhuicatl quixoticac,

tzimpatlahuac, cuapitzahuac,

Huel inepantla in ilhuicatl, huel iyolloco in ahciticac ilhuicatl

Huel ilhuicayollotitech ahciticac

in iuh ittoya ompa tlapcopa in hualmoquetzaya

Oiuh onquiz yohualnepantla, in neciya tlathuiliaya, ipan tlathuiya

Quin yehuatl quihualpoloaya in tonatiuh In icuac hualquizaya

huel cexihuitl in hualmoquetzaya

(ipan matlactlomome calli in peuh)

Auh in icuac neciya tlacahuacaya, netenhuitecoya,

neizahuiloya, tlatemmachoya

Inic ontetl tezahuitl mochiuh, nican mexico, zan monomahui in tlatlac, cuetlan

Ayac ma quitlecahui zan monoma tlecahui,

in ical diablo huitzilopochtli mihtoaya itocayocan tlacatecca

in nez ye tlatla in tlaquetzalli

iihtic hualquiza in tlemiyahuatl, in tlenenepilli, in tlecuezallotl,

cenca zan iciuhca compalo in ixquich calcuahuitl.

Nican ye ic tlacahuaca quihtoa.

Mexicae, ma huallatotoca, tla cehuiloz, amapilol

Auh in icuac caatequiaya, in quicehuiznequiya,

Zan ye ilhuice mopitza, ayocmo huel ceuh, huellallac

Inic etetl tetzahuitl, huitecoc ipan tlatlatzin teocalli,
zan xacalli catca, itocayocan tzommolco,

Iteopan in Xihtecutli, amo tilahuaya,

Zan ahuachquiyahuia in iuh tetzammachoc

Iuh mihto in ca zan tonalhuitecoc

Amono caquiztic in tlatlatziniliztli

Inic nauhtetl tetzamachiyotl,

oc onca in tonatiuh in xihuitl huetz

Yeteetia, ompa hualpeuh in tonatiuh icalaquiyampa

Auh ompa itztia in iquizayampa

Iuhquin tlexochtli pipixauhtiuh,

Hueca mocuitlapiltitiuh, hueca ahcitiuh in icuitlapil

Auh in oittoc cenca tlacahuacac

Iuhquin oyoalli onmoma

Inic macuiltetl tetzahuitl,

pozon in atl amo i ehecatl quipozonalti

Iuhqui momoloca, iuhqui xixitemomoloca:

cenca hueca in ya inic macoquetz

Auh in calli tzitzintla cahcic

auh capapachiuh xixitin in calli

yehuatl in huei atl totlan mani nican mexico

Inic chicuacentlamantli tetzahuitl,

miyecpa cihuatl cacoya chocatiuh,

tzatzitiuh, yohualtica cenca tzahtzi:

Quihtotinemi, nonopilhuantzitzin ye ic zan ye tohui:

In quenmania quihtoa, nonopilhuantzitzin campa namechnohuiquiliz

Inic chicontlamantli tetzahuitl, ceppa tlatlamaya

Manozo tlamaitlahuiaya in atlaca

Centetl cahcique tototl, nextic. Iuhquin tocuilcoyotl.

Niman quittilico in motecuzoma,

tlillan calmecac omotzcalo in tonatiuh, oc tlaca:

Iuhquin tezcatl icpac mani, malacachtic

Tehuilacachtic, iuhqui xapotticac:
Onpa onneciya in ilhuicatl

In mamalhuaz in cicitlalti

Auh in motecuzoma cenca quimotetzahui

in icuac quimittac cicitlalti ihuan mamalhuaztli

Auh inic oppa ontlachix, in icpac tototl

Ene quittac iuhqui on in ma acame moquequetztitihuitze,

tepeuhtihuitze moyaochichiuhtihuitze

quinmama mamaza

Auh niman quinnotz in tlaciuhque in tlamatinime quimilhui

Amo anquimati, in tlein onoconittac

iuhquin acame moquequetztihuitze

Auh ye quinanquilizquiya in conittaque opoliuh

ayoc tle huel quitoqueh.

Inic chicuetetl tetzahuitl,

Miyecpa motenextiliaya tlaca tlacanetzolti

ontetzontecomeque za ce in intlac

onpa quimonhuicaya in tlillan calmecac

Ompa quimittaya in motecuzoma: in oquittac niman polihuiya