Florentine

Chapter 3

Inic eyi capitulo

Oncan mihtoa in tezcuco tlatoque, inic izqui xihuitl tlatocatque

Inic ce tezcuco tlatoani,

quipehualti in tlatocayotl in tezcuco yehuatl in tlaltecatzin zan nappohualilhuitl

in tlatocat atle ipan mochiuh, chichimeca tlatoqueh y

Auh inic ome tlatoani mochiuh in quihualtoquili in tlaltecatzin yehuatl

in techotlalatzin chichimecatl

auh in tlatocat yepohualxihuitl ihuan matlacxihuitl

amo tle ipan mochiuh

Auh inic ey, tlatoani mochiuh acolhuacan yehuatl in huehue ixtlilxochitl

in tlatocat epohualxihuitl ihuan macuilxihuitl amo tle ipan mochiuh

Auh inic nahui tlatoani mochiuh tezcuco yehuatl in nezahualcoyotzin

in tlatocat yepohualxihuitl ihuan matlacxihuitl ihuan cexihuitl auh in yehuatl,

y, in nezahualcoyotzin ipan peuh in yaoyotl im omextin in tenochtitlan tlatoani.

Itzcoatzin inic quipeuhque tepaneca:

auh in nohuian tepeuhque quin yehuatl quipehualti in nezahualcoyotzin

in quitecac in petlatl in icpalli in acolhuacan tezcuco.

Auh inic macuilli, mochiuh tlatoani tetzcuco,

yehuatl in nezahualpilli auh in tlatocat ompohualxihitl on matlactli ihuan exihuitl

in ipan mochiuh yaoyotl in nohuian ic tepehualoya

auh in yehuantin im omextin in nezahualcoyotzin ihuan nezahualpilli

in icuac tlatocatque tzacuticatca in tlaxcalla ihuan huexotzinco.

Auh in nezahualpilli ipan peuh in tlein hualmoquetzaya ilhuicatitech

in iuhqui tlanextli in iuhqui tlemiyahuatl iceyoal,

auh nauhxihuitl in ipan mochiuh ipan xiuhtonalli chicome tecpatl

in yancuican necico auh impoliuh ipan xiuhtonalli matlactloce tecpatl

auh inic tlamanca nauhxihuitl. miyeccan xiti tepetl in texcalli

auh in icuac polihui in tlen hualmoquequetzaya

oc iuh nauhxihuitl ahciquiuh in Españoles

auh icuac mic in nezahualpilli aocmo ixpan.

Auh inic chicuacen tlatoani mochiuh tetzcoco yehuatl in cacamatzin in tlatocat nauhxihuitl. Yehuatl ipan mochiuh inic ahcico nican castillan tlaca.

Auh inic chicome tlatoani mochiuh tetzcoco.

Yehuatl in Coanacochtzin in tllatocat macuilxihuitl

Yehuatl ipan mochiuh inic pehualoque mexica

im omextin cuauhtemoctzin tenochtitlan tlatoani.

Auh inic chicueyi tlatoani mochiuh tetzcoco yehuatl in tecocoltzin in tlatocat cexihuitl

ye imixpan in Castillan tlaca ye icuac in tetzcoco catca marquez

oncan moyaochichiuh inic quimpeuh mexica.

Inic chiconnahui tlatoani mochiuh tetzcoco yehuatl in ixtlilxochitzin

in tlatocat chicuexihuitl

auh in icuac pehualoque mexica quihuicatiuhya in marquez itlan ommoquetz

ihuan quihuicaya in huey mollan

yehuantin imixpan mochiuh inic huel motlatlali altepetl

inic tlahuellalali marquez nehuan coanacochtli.

Inic matlactli tlatoani mochiuh tetzcoco yehuatl in yoyontzin in tlatocat cexihuitl.

Inic matlactloce tlatoani mochiuh tetzcoco

yehuatl in tetlahuehuetzquititzin in tlatocat macuilxihuitl.

Inic matlactlomome tlatoani mochiuh tetzcoco yehuatl in don Antonio Tlahuitoltzin

in tlatocat Chicuacexihuitl.

Inic matlactli omey tlatoani mochiuh tetzcuco,

yehuatl in axcan tlatoani don hernando pimentel,

in otlatocat achi cempohualxihuitl

Auh ye ixquich cahuitl quipiya in tlatocayotl in acolhuaqueh

in ye ic mocempoa caxtolpohualxihuitl ihuan nauhxihuitl,

In ixquich cahuitl in oahcico espanoles.