Chapter 20, continued
In icuac motlauhtia tequihuaque,
i huel imelahuaca i ye icentzontecca, oquihualitquique tlahtolli.
Auh inic hualcalaquiya in titlanti intla otonacatlamaloc,
ic monextitihuitze mochintin quihcuixtihuitze in incuatzon ontlalpihtihuitze.
Ipampa ca otonacatlamaloc. Ic quitemachitiaya.
Auh cenca ic pahpaque im macehualtin in quimittaya. In ontlacuixtihuitze.
Quihtoa, anca otonacatlamaloc ca mochintin ontlacuixtihui in titlanti,
auh intla cequintin ic xeliuhtihuitze in aocmo ontlalpihtihuitze,
in aocmo, ihcuixtihuitz incuatzon in za tontiuh. Ic quinextiaya,
ca otlamaloc ihuan omicohuac in yaoc.
Auh in oquimittaque macehualtin niman ic tlachoquiztlehua.
Niman iuh quitoa, anca omicohuac.
Auh im pipiltin in icuac tlaotlamahque. Amo motecozahualtia,
zan tlauhtiac mohzaya quicemaque in nohuiya intech.
Auh mopotonia cuauhtlachcayotica.
Auh in quintlauhtia moteccuizoma moch yehuatl
in tlatocatilmahtli. In tlatocamaxtlatl. I cenca tlazohtli immahuizzo.
Ihuan tlazotlanque quetzallahuiztli teocuitlayo.
Ihuan chimalli. Azo quetzalcozcayo i huel tlazohtli chimalli.
Auh in yehuatl imal intla ohualyoltia niman quimpiyeltia in calpixque
huel quimocuitlahuia inic amo cocolizcuic
intla oc cempohualtiz anozoc ompohualtiz. In quipiyezque.
Auh i ye icuac miquiz malli, in yehuatl tlamani
Niman ye ic quimaca im moteccuizoma in tlahuiztli quetzalcomitl
inic ipan tlamictiz. Amo huel itech pohuia zan ipan tlamictia.
Ipan mitotia ichicahuaz yetiuh. Anozo itzpapalotl
anozo quetzalcomitl teocuitlayo in quimama in ipan tlamictia.
Auh in yehuatl malli. Niman ic quihuica in ompa miquiz temalacac icpac
cantiuh contehcahuia, in oncan cuahuanazque malli. Imac concahua itoca
cuetlachhuehue. In imac onacitimanca mamaltin iuhquinma impilhuan
quinchihuaya. Auh niman conmaca in yocotzonteuh nauhtetl inic
quimomotlaz tlahuahuanque. Ihuan quimaca ichimal imaccuauh.
Amo tenitzyo zan tlapotonilli.
Auh i yehuantin in tehuahuanaya in tletlenamacaque in tlamacaque.
Auh in tlamani zan moquetzticac tlatzintlan quitzticac in imal.
Auh in ye iuhqui in oquicencauh malli in cuitlachhuehue,
niman ye ic yauh quitiz in octli mihtoaya teooctli.
Inic quitqui acatecomatl tlatempotonilli. In onya.
Niman ic conyahua in ompa hualquiza tonatiuh
mochi iuh quichihua in chimalli im maccuahuitl moch conyahua.
Inic commaca malli. Auh in oconiti cuetlachhuehue.
Niman ye ic yauh in tlamicti inic quihuahuanaz
ichimal imaccuauh yetiuh tenitzyo tlapotonilli
Auh in onya. Niman ye conhuitequi im malli.
Auh no quihualhuitequi auh intla yollo chicahuac
im malli intla huel tiacauh i huel oquichtli.
Azo yey tlacatl anozo nahui tlacatl in quimonyehyecoltia.
Quin icuac huel quimictia in ohuelhuetz.
Auh intlacamo oquichtli intlacamo tiacauh
zan niman onmoteca in oncan temalacac amo ontlayehecoa.
Zan iciuhca ommaquetztiteca niman ic coneltequi
concuilia in iyollo conyahuilia in tonatiuh. Ompa hualquiza.
Auh i ye iuhqui ommicohuac, niman ye ic mihtotia in tlahuahuanque
in otemictique in yehuantin tlamacazqueh.
In ipan mihtotia cecentetl in tzontecomatl intlan cana.
Niman ye ic choca quinchoquilia in yehuantin ipilhuan in omicque.
Auh i yehuatl malli niman ye ic quixipehua in tlathui ye totec,
zan moquetzticacqui in iehuayo.
In ixquichtin omicque mamaltin moch onneaquilo in imehuayo.
Oncan mocenquixtia i yopihco in diablo ithualco.
Inchimal immaccuauh yetiuh inchicahuaztopil.
Auh no mocenquixtiaya i huehuey tiacahuan yetihui.
I yaopan mihuintiani. Huel ixquich tlacatl incuauh yetoc,
yehuatl in ococuahuitl immac onoc in quitquitoque.
Oc huel yohuan im moteca immac tlacuixtoque
atle inchimal zanyo in cuahuitl quitquitoque.
Quichixtimani in quemman hualquizaz tonatiuh.
Auh in hualquiz niman ye ic motecpana in tototectin. Huel ixquichtin.
Auh in tiacahuan niman ye ic no motecpana
quimixnamictimomana in tototectin. Azo nauhmapa. In motztimani,
auh niman ye ic ompehua in tiacahua ihuicpa
onhuetzi in tototecti quimoncotonilia in inxic
zan huel iciuhca in oquimocotonilique
niman ye ic quintoca quimicaltihui
ompa quimonmana in innemanaya in itocayocan totectzontecontitlan.
Oncan hualmocuepa in tiacahuan. Zan tequitl quimoncahua.
Auh i ye iuhqui niman ye ic hui in tecpan cacalaquizque in tototectin.
Acan quimocahuia in calli in techan.
Huel nohuiyan calaque auh im macehualli ye iuhca inyollo quinchiye.
In quimmaca in inchiyel. Ocholli. Huilocpallaxcalli. Itzocoyouh. Nenepanolli
Zan cemilhuitl in tepancacalaque in ontlazotlalo.
Auh in imoztlayoc anozo i cempohualloc.
Za campa quiquiza azo tianquizco. Tlatlaehuan.
Quixelhuia. Azo chilli, iztatl azo cuahuitl. Azo ocotl.
Anozo tlaolli i ye mochi tianquizco onoc. Momoztlae ihui.
Auh in oahcique cempohualilhuitl niman ye ic hui i yopihco.
niman contepehua oztoc huel huecatlan ompa contoca.
Quipapatla in zazo catlehuatl conaquiz.
Auh in icuahtlalpiaya coztic teocuitlatl in itecpayo.
Auh in itilma, azo coaxayacayo, anozo ihuitica tehtecomayo,
anozo ocelotentlapalli in quimaca. Moteccuizoma ihuan maxtlatl yacahuiac
azo cuauhiztiyo, anozo tianquiztli ommantiuh in maxtlatl.
Icuac yancuican quicui in cactli, amo tlahmachyo amo cuicuiltic zan tliltic.
In icuetlaxmecayo azo huitztecolli. Anozo chichiltic cuetlaxtli.
Auh in icuac ye yauh tecpan ommocactia inic ohtli quitoca.
Cenca momahuizzotitiuh ipampa ca itiacauh im moteccuizoma.
Cenca motleyotitiuh. Auh i ye onahci cuauhquiyahuac
quicopina in icac quitlalia aoc momocactia
inic calaqui tecpan tlahtoca in ompa cate huehuey cuacuauhtin.
Huehuey ocelome i yaotachcahuan.
Auh no icuac quimahcehua in tocaitl im mihtoa tlacochcalcatl.
Anozo tlacateccatl. Intla miquiz tlacochcalcatl anozo tlacateccatl
Yehuantin im ixiptlayohuan mochihuaya.
Quihtoaya itlahtocahuan mochihua in tonatiuh.
Auh in ixquichtin i yaotequihuaque i yaotitlancalaque i
ye mochintin in quintlauhtiaya moteccuizoma.
Icuac in tequiquiztiloya in tlacaxipehualiztli
in quimmacaya tlilpapatlahuac chichicueyi zotl nanauhmaca.
Auh no ihui in telpochiaque in quimmacaya
camopaltenhuahuanque colotlalpilli nochpalmaxtlatl yacayecacozcayo.
Auh i yehuantin in in otiquinteneuhque i yaotencuaque i yaotachcahuan.
Oncan quizaya in quincuachicximaya. Motecuizoma
anozo quimotonximaya. In tiacahuan catca.
In icuac zazocampa hualmitoaya yaoyotl zan mochipa
quichixticate quipopouhticate in incuauhyo in imoceloyo
inic oquichtin inic tiacahuan. Inic ayac in huihui
za quipopouhtinemi in immiquiz.
Im ma hualmihto yaoyotl im ma momiquiti ma occe ontlamati
in oc quexquich cahuitl nemizque,
auh intla ohualmihto yaoyotl niman cemolini i ye ixtlacatl mexicatl.
Tlatlacatecca in oahcito in ompa tepehuazque. Oc cemilhuipan in yaoteca.
Auh i ye ompa yaoc. Omettitihui in cuacuachictin.
No omettitihui, in otomi. Intla ce oyaomic cuachic.
Intla occe hualmocuepa cuachique. Niman ic quitohtocaya in motecuzoma.
Aocmo calaque in cuauhcalli. Zan iccen quicallatiaya. Aocca moneque.
Auh quicahualtiaya inic cuachic.
Auh zan ye no iuh quintlatzacuiltiaya in otomi
intla zan no ce omic intla occe hualmocuepa.
Quitohtoca quicahualtia inic tiacauh.
Auh no quicahualtia inic otlamamauhtiaya.
In ixquich in itech oquitlaliaya in tlazotilmahtli, in tlazomaxtlatl.
Aoc tle quicui. Zan ichtilmahtzintli. Anozo iczotilmahtzintli.
In quimolpilia, inic quitlamahcehualmacaya.
Auh in quilnamiquia azo ce xihuitl anozo onxihuitl.
In quitemoaya. Ichan in quihualanaya. Auh in onya ixpan motecuzoma.
Niman ye ic quihualmaca in tlahuiztli azo quetzallo. Anozo teocuitlayo.
Niman quitlauhtia, cen quimilli in quimaca tilmahtli.
Ihuan quitlaoltia cem acalli in quimaca tlaolli ihuan quichientia.
Azo ontetl i huey tzincopinque ic quitamachihua chien.
Auh quin ye no ceppa icuac tetlan motlalia in cuauhcalli.
Ipampa ca ontlamahceuh oc ceppa mochi quicui
in tlazotilmahtli in tlazomaxtlatl. In ixquich itech pohui in imahuizzo.
Auh intla icuachicyo intla yotonyo ipan otlama in ompa atlixco
anozo huexotzinco oc cenca ic paquiya in iyollo motecuzoma.
Ihuan in ixquichtin tlahtoque ic papaque ic motlamachtiaya ic ahahuiaya.
In oypan tlamahque incuachicyo in imotonyo.
Impampa ca oquimyahuayotito in cuauhyotl in oceloyotl.
Oncan quiztihuiya oncan pepenaloya.
In tlacochcalcatl in tlacateccatl mochihuaya.
Oncan i tlamiani in cuauhyotl inic panhuechoaya
inic ayac zan campa omochichihuaya. Ayac zan icalitic.
Oquicuic in ixquich inechichihual.
Ca nel mitl ca chimalli in oihuac in ocualoc.
Auh in oquemohuac in tilmahtli im maxtlatl.