Florentine

Chapter 21

Inic cempohualli oce capitulo, oncan mitoa,

in iuhquima tlamamatlatl inic tlecoya in ixquichica tecutlato muchihua.

Auh izcatqui inic ontzinti, in inemiliz in telpochtontli,

in iacachto zan oc mocuatezonoa in oc piltontli:

auh in ye matlacxihuitl icuac mocuexpaltia,

auh in caxtolxihuitl, icuac cuexpalchicacpul muchihua in acan tlama.

Auh intla tepal otlama azo oteoncayoti, anozo oteecayoti,

anozo otenauhcayoti, anozo otemacuilcayoti,

anozo otechicuacencayoti oncan tlantica inic tepal tlamalo inic necuexpallazalo.

Auh inic quimoxexelhuia inmal chicuaceccan quiza.

Inic ce huel yehuatl in tlamani quicui in itlac:

ihuan ce imetz: yehuatl in tomayauhcanpa tocxi:

auh inic teoncayotia, quicui in topochcopa tometz.

Auh inic tehecayotia: quicui in tomayauhcampa tahcul.

Inic tenauhcayotia: quicui in topochcopa tahcul

Inic temacuilcayotia: quicui in tomayauhcampa tomatzotzopaz.

Auh inic tlachicuacencayotia yehuatl quicui in topochcopa tomatzotzopaz.

Auh in in icuac mocuexpallaza, inic moxima motzotzocoltia quihuallamachia

in innexin imayauhcanpa quihualhuilancayotia inacaz itzintlan

hualahci iyoca motema initzotzocul:

in icuac y oc centetl quicui inixayac oc centlamantli

ic tlachia inic ittoz ca otepallama omocuexpallaz.

Auh niman ic quitlatlauhtia in icul anozo itlatzin quilhuia.

Noxhuiuhtze omitzmixamili in tonatiuh, in tlaltecutli ocentetl ticcuic in moxayac,

auh za otiya, inhuicpac xonmomayahui ma mitzhuicacan in toyaohuan

intla nen oc ceppa tepal xitlama

tle tiez cuiz timatzotzocoltiz,

ma nen ye no cuel tepal titlama za inca ximomotla in toyaohuan.

Auh in aquin amo tepallama in azo ic ezpa anozo ic nappa iloti in yaoc

quitocayotia cuexpalchicacpol

auh in iuh ipan mitoa y ic pinahua,

quin icuac teca momotla inic tepallama.

Auh intla tepal otlama icuac mopotonia,

auh in aquin zan niman amo tepallama,

amo huel mocuexpallaza amo no mopotonia,

inic moxima mocuayahualxima zaniyo inicoa nepantla quichichiqui.

Auh ini azo ye imacehualti in tlalticpacayotl, in necuiltonolli,

auh anozo zan motolinia,

auh inomocuexpallaz aye tle quicui,

aye tle itech quitlalia tlamacho tilmahtli

zan oc ce in iztac in ichtilmaton iztac in imaxtlaton,

auh in aquin huel oquimixcahui otlama

in oce cahcic ic motocayotia telpochiyaqui tlamani.

Auh in icuac y quin icuac ixpan quihuica in motecozoma in ompa tlatocan.

Auh itencopa inic motecuzauhtiltia mixtlapalhuatzalhuia quicemaquia in ixayac,

auh in icanahuacan quitecozauhhuia in icalpixcahuan motecuzoma.

Auh quin icuac quitlauhtia in motecuzoma

in quimaca camopaltenhuahuanqui ihuan centetl colotlalpilli,

ihuan centetl nochpalmastlatl iacahuiac ihuan centetl centzonmaxtlatl tlatlapalli,

auh icuac compehualtia in tlacuiloltilmahtli quiquemi.

Auh inic ome cahci zan no ompa quihuica in ixpan motecuzoma

in tlatocan auh zan ye no iuhqui in inetlauhtil mochihuaya in omito.

Auh inic ei cahci zan ye no iuhqui in inetlauhtil mochihua,

auh oncan canaya in quitiachcauhtecaya in telpochyaqui

quicalaquiaya inhueyican in telpochcali inic ompa tlacahuapahua tlacazcaltia

ompa quimizcaltia in telpopochtin, on cuicoyanhuaya in yohualtica in ompa cuicacalli.

Auh inic nahui cahci yeh icuac quitequihuacaxima in motecuzoma

motocayotia tequihua,

auh no icuac compehualtia in tequihuacatocaitl azo mexicatl tequihua,

anozo tolnahuacatl tequihua anozo cihuatecpanecatl tequihua

in ixquich tequihuacatocaitl,

auh huel icuac contlalia impetlapan icpalpan in cuauhcalli

in ompa cenquiztoque in huehuei tiacahuan in ompa cate in tlacochcalcatl

in tlacateccatl in ticociahuacatl, tocuiltecatl, atenpanecatl,

yehuantin cuauhiaca i, tenzacahuaque cuetlaxnacochique

cuauhtlalpiloni inic ontlalpiloque.

Auh intla chicuacen intla chicome anozo matlactin oquimacic cueztecatl,

azo tenitl amo ic panhuetzi, zan ye itoca in yaotequihua

ca quin icuac intla otlamato atlixco anozo huexotzinco,

anozo tliliuhquitepec inic macuilli cahci

icuac huel panhuetzi inic hueitiacauh in itoca cuauhyacatl

niman quimaca in motecuzoma xoxouhqui tezacatl ihuan tlalpiloni

azo iztac teocuitlatl in itecpayo, ihuan cuetlaxnacochtli ihuan chichiltic cuechintli.

Auh no icuac maco in tilmahtli chicuapalnacazminqui, ihuan cuetlaxtilmahtli.

Auh intla ome cahcitiuh in atlixco anozo huexotzinco ye ic centlamamauhtia

icuac quimaca in coztic tenzacatl yomexti quititlani in xoxouhqui tenzacatl.

Appendix
Continuation of Chapter 14, paragraph 4

Calmecac, mexico, oncan tecpanoaya, oncan mocenquixtiaya

in ixquichtin teopixque in tlenamacaque, in tlamacazque

in itlamaceuhcahuan catca altepetl,

conchiyaya in azo itla ic quintemoz tlatoani, azo itla ic tlatlaniz,

azo itla quitta in ompa izquican omoxtlahua in tepeticpac,

ihuan atlan, ihuan in ompa hueca caca momoztli,

iceceyohual ye tlamacehua.

Ca y yehuantin tlenamacaque, tlamacazque catca

icuac quizaya in tlacuauhtlapoyahua,

in mitoaya yancuican tlatlapitzalo,

achto mizoya in ixpan tlacatecolotl ica huitztli, in metl ihuitzo,
niman ceceyaca quizaya, zan petlauhtihuia,

zan ixquich onactihuia in intoxi intlamecayouh oncan tentiuh yacualli

yehuatl im picietl tlanelolli tlilli in quicuatihuia,

ihuan quitquitihuia tlemaitl tzacutiuh onca yetiuh tletl,

ihuan xiquipiltontli ic icatiuh copalli, ihuan ocotl,

ihuan quiciacahuia in yacxoyauh, ihuan in ihuitz yehezo,
ihuan tecuciztli in itlapitzal in manel cenca quiyahuiz,

anozo cehuetziz iuhca huiya.

In icuac in oahcic campa tepetitech tlamatiuh

niman ye oncan moxtlahua, tlenamaca,

contema in yacxoyauh in ihuitz yehezo,

quihualcaqui in queman tlapitzaloz mexico i yohualnepantla,

auh in otlapitzaloc mexico yohualnepantla,

niman ye nohuian tlapitza in tlamacazque in tlamaceuhque

in ompa tepetitech in campa omoxtlahua,

niman hualmocuepa tlatlapitztihuitze ye tlathuinahuac,

In hualcalaqui calmecac

Auh in tlatoani intla quimachiliz, tlenamacac,

tlamacazqui omomecati, oquittac cihuatl,

niman quitlatzontequilia, quitzacutiuh, namoelo,

tlatataco in ichan, atl neneci, zan no iuh tlatzontequililoya

intla otlahuan tlenamacac, tlamacazqui.