Florentine

Ic cempohualli capitulo: oncan mitoa,

in quenin quinhuapahuaya in inpilhuan tlatoque, ihuan pipiltin

Auh nican mitoa: in innehuapahualiz in yehuantin in tlatoque impilhuan,

ihuan in ixquichtin in tlazopipiltin in inpilhuan tlatoque, pipiltin,

yehuantin in innahuan, in intahuan quimizcaltia, quinhuapahua,

anozo chichihuame in quinhuapahua in oc pipiltotontin

auh in icuac ye uel nenemi, azo ye chicuacenxiuhtia,

niman ye ic yauh in mahuiltiz,
in quinhuica ixolohuan azo ome anozo ei in caahuiltiz,

yehuantin quincocoltia in itatzin in inantzin inic amo tlahuelilocatiz,

inic amo quimocuitlahuiz tlahuelilocayotl: in icuac otli quitocaz.

Auh no cenca quicuitlahuiltiaya inic huel tenotzaz, inic cualli yez in itlatol,

inic teimacahciz, inic temauhcaittaz, azo cana quinamiquiz azo tecutlato,

anozo achcauhtlayacati, anozo yaotequihua, anozo zan aca tlapaltzintli,

anozo huehuentzin, anozo ilamatzin, anozo aca motolinia,

quitlapaloz cenca mopechteca,

quilhuia: xihualmohuica nocoltzine,ma nimitznotlaxili:

auh in yehuatl oquitlapalo huehuentzin

niman quilhuia noxhuiuhtzine cozcatle quetzalle

otinechmocnelili ma ximonenemiti:

auh inic iuh tetlapaloa, y, in piltontli,

ic cenca quiyectenehua, cenca ic papaqui, ic motlamachtia, quitoa:

quenami yetihui in piltzintli intla nemiz ca tel pilli, azo itla imacehual yez.

Auh in icuac ye matlacxiuhtia azo ye omome, anozo ye omei,

icuac quicalaquiya in calmecac, inmac quimoncahuaya in tlenamacaque,

in tlamacazque, inic ompa izcaltiloz nonotzaloz,

tlachyeltiloz inic huel nemiz quicuitlahuiltia in tlamacehualiztli,

in yohualtica in acxoyatlaliliztli izazocampa acxoyatlalitiuh in tepeticpac,

in ompa onmicoya yohualnepantla, anoce cuicacali quicalaquia,

inmac concahua in tiachcahuan, quicuitlahuiltia in tlachpanaliztli,

anozo cuicoyanoliztli, in ixquich tlamantli tlamacehualiztli mochihuaya.

Auh in icuac ye caxtolxiuhtia icuac moyaomamachtia

anozo aci cempohualxihuitl inic quiza yaoc,

in yehuantin tequihuaque achtopa quinnotza quintlacualtia.

quimatlitia, ihuan quintlauhtia in ixquichtin tequihuaque,

in quinmaca azo cuachtli anozo nochpalmaxtlatl, anozo tlacuilolli in tilmahtli.

Auh niman quitlatlauhtia in tequihuaque,

zan ye no iuhqui in omihto tlacpac inic quintlatlauhtia.

Auh niman ic quihuica, in yaoc: huel quimocuitlahuitihui in tequihuaque,

in ma cana xiccahualo: auh huel quimachtia, in iuh momana chimalli,

in iuh yaotihua, in iuh mochimaltopehua mitl.

Auh in icuac ye mochihua yaoyotl, in ye necalihua, anoce ye tlamalo,

huel conittitia, huel contlachyeltia, in ompa tlamaz:

azo niman tepallama, anozo niman huel ce cahci:

ipampa ca cenca necuitlahuilo ca miyec tlacatl in itiacauh mochihua.

Auh in ye tlamalo, niman achtopa hualpeuhtiquiza in tequitque tlapalihui,

intoca tequipan titlanti in quihualnonotztihuetzi motecuzuma:

auh in oahcico tequipan titlanti, niman ic iciuhca calactihuetzi

ipan in motezuma quilhuia.

Totecuyoe notelpotzine, ma ximotlacotili, ma ximotequitili,

ca oicnopiltic, oimacehualtic, in tetzahuitl in huitzilopochtli,

ca otepan quitopeuh in cuauhtenamitl, in ocelotenamitl, ca oya in altepetl:

in ompa tlatlamatitiaque in mexica tenochca,

in mexica tlatilolca, in tepanecatl, in aculhoa, in otomitl,

in matlatzincatl, iye ixquich tlalhuacpanecatl in chinampanecatl.

Auh quimilhuiaya in motezuma, oanquiciauhque,

oanquihiyohuique in oceloquichtle:

ximotlalican azo zan annechiztlacahuia,

ma oc nicchiya in ineltica tlatolli:

auh niman quimoncaltzacua intlacamo melahuac tlatolli

oquicaquitique motezuma quintlatlatia quinpopoloa.

Auh in ompa yaoc in icuac otlamaloc,

in ye iuhqui in oya in oompoliuh, altepetl:

niman ic mocempoa im mamaltin

in oncan huacaltitla quezqui oaxihuac in tenochtitlan,

quezqui oaxihuac in tlatilolco, auh inic nohuiyan cenchinanpanecatl,

centlalhuacpanecatl, mocemitta in mamalti quezquitzontli omochiuh.

Yehuantin tlapoa in tlatlacochcalca, in tlatlacatecca:

auh niman ic huallatitlani, in nican mexico,

in hualmotitlani yehuantin in tetequihuaque,

in quihualnonotza motecuzuma, in ye huel imelahuaca in icentzontecca,

in quihualitqui tlatolli, in quezquitzontli omochiuh malli:

auh in quimelahuiliaya in quezquintin otlacnopilhuique in pipiltin in otlamaque,

azo cequintin motequihuacaxima, anoce cequintin telpochyacati.

In quicaquiya in motecuzuma cenca ic papaquia

ipampa ca ipilhuan in ontlamaque:

auh quin icuac quinquixtiaya, in quincaltzacuaya in tequipan titlanti

Quin notehuan motlauhtiaya.

Auh intla hualmitoz yaoyotl in atlixco, azo huexotzinco,

intla oc ceppa ompa tlamazque, cenca ic huel panhuetzi,

ic cenca huel quinmahuiztilia in motecuzuma:

ipampa ca ipilhuan in ontlamaque, in onmotenyotique,

in oconmiyahuayotique in pillotl in cuauhyotl, in oceloyotl,

ic oncan in quiza in tlatocati, in quipachoa altepetl,

auh quin icuac intlan quintlalia:

itlan tlacua in motecuzuma

in quinmaca coztic tezacatl, anozo coztic tencololli, anozo xoxouhqui tezacatl,

anozo xoxouhqui tencololli, anozo chalchiuhtencololli,

anozo chalchiuhtentetl, anozo tlanitentetl:

niman ic quetzallalpiloni teocuitlatica tecpayo,

ihuan teocuitlatl in ipepeyocyo, anozo zacuan tlalpiloni,

ihuan cuetlaxnacochtli, ihuan tlazotilmahtli, yehuatl in tlatocatilmahtli in itzcoayo,

anozo ixnextentlapallo, anoce ihuiticatetecomayo

anoce itzmixicalcoliuhqui, ihuan tlazomaxtlatl, anoce tzicoliuhqui maxtlatl,

yacaichcayo, izazo quexquich tlazomaxtlatl, ihuan tlahuiztli,

azo quetzalpatzactli, anozo teocuitlapanitl, anozo tozcuaxolotl,

anozo teocuitlacuacalalatli, anoce teocuitlacopilli,

anozo quetzalpanitl, anoce itzpapalotl quetzallo teocuitlatl in ixtelolo,

ihuan tlazochimalli, azo xiuhtotoyehuatl,

anoce tocehuatl in ye huel ixquich tlazotlanqui chimalli,

ihuan quinmaca calpixcantli, azo occan, anozo excan in quinmaca:

ipampa ca nel ocahcique.

Auh intla miquiz tlatoani: yehuantin ceme analoya,

inic yehuantin quipachozque altepetl. Auh zan no yehuantin,

cequintin ontlalilo tlacxitlan, in oncan tecutlatoa, in tlatzontequi,

in quitzontecticate miquiztli: tlacochcalcatl tecutli,

anozo ticociahuacatl, tecutli, azo cihuacoatl tecutli, anozo tlillancalqui tecutli.