Florentine

Chapter 2

Inic ome capitulo itechpa tlatoa in tlatoque in otlatocatque tlatilolco.

In ayamo polihui tlatocayotl,

ihuan in zatepan oc ceppa oquinmacaque oquincuepilique españoles

in ixquich ica ipan xihuitl de 1560.

Inic ce tlatilolco tlatoani Cuacuappitzahuac

achto compehualti tlatocat in tlatilolco yepohualxihuitl omome,

quimpeuh in tenayocan tlaca, ihuan coacalco ihuan xaltocan,

in yehuatl, i, ic tlatocat quinnamicticatca omentin tlatoque in tenochtitlan

in omoteneuhque Acamapichtli ihuan huitzilihuitl.

Inic ome tlatilolco tlatoani. Tlacateotl ic ome, tlatocat in tlatilolco,

cempohualxihuitl ipan caxtolxihuitl omei,

ipan mochiuh inic pehualoc ixquich acolhuacatl ihuan coihuacatl.

Inic ei tlatilolco, tlatoani Cuauhtlatoa,

ic ei tlatocat in tlatilolco cempohualxihuitl ipan caxtolli omei xihuitl,

quinnamicticatca no omentin tlatoque catca in tenochtitlan,

yehuatl itzcoatl, ihua huehue motecozuma.

Ipan mochiuh inic poliuh inic pehualoc, azcapotzalcatl

ihuan coaixtlahuacan, ihuan cuetlaxtlan, ihuan cuauhtlinchan, ihuan xochmilco ihuan in ixquich cuauhnahuacatl.

Inic nahui tlatilolco tlatoani. Moquihuixtli, ic nahui tlatocat in tlatilolco:

chicunauhxihuitl, ipan impoliuh tlatocayotl tlatilolco,

inic zan mococolique in itex axayaca tlatoani tenochtitlan,

inic quiyaochiuh moquihuixtli ihuan tlatilolca.

Auh in yehuatl moquihuixtli zan inoma in tlecotihuetz iicpac teocalli inic ompa hualmomayauh inic oncan mic.

Don pedro temilo icuac omotlatocatlali in tlatilolco,

yehuatl ye no compehualti in tlatocayotl,

in o iuh conacique compeuhque Españoles in altepetl mexico,

nohuiyan quihuicatinen in hue[n]ca españoles inic tepeuhque

in cuextlan, hundurax, cuauhtemallan.

Don Martin hêca ic ome tlatocat in tlatilolco: exihuitl ye impan in españoles.

Ipan mochiuh icihuacoatl quicua piltzintli cozolco onoca, ompa azcapotzalco:

ihuan ipan mochiuh, onteme cuacuauhti cuauhcalco,

Manca no manca in oncan tlatilolco iciuh chicuexihuitl

mani cuauhcalco motetique tlatlazque,

oontetl in cuauhtetl quitlazque i cecentetl cuauhtli.

Don Ihuan ahuellittoc ic ei tlatocat, in tlatilolco nauhxihuitl.

Don Ihuan cuahuic onoc, ic nahui tlatocat in tlatilolco chicoxihuitl

Ihuan icuac tlatocati Don pablo Xochiquen in tenochtitlan

in mochiuh tlatilolco huei tlamahuizolli huei neixcuitilli inic tlamiz cemanahuac.

Don Alonso cuauhnochtli, ic macuilli tlatocat in tlatilolco oxihuitl.

Don Martin tlacateccatl, ic chicuacen tlatocat in tlatilolco chicuacexihuitl.

Ipan mochiuh in omoteneuh Huei cocoliztli ihuan in yaoyotl

inic pehualoque chichimeca, nochtlan tlaca.

Scibola, ipan Don Antonio de Mendoza

Huixorrei in nican yancuic España.

Don diego Huitznahuatlailotlac ic chicome tlatocat in tlatilolco.

Ipan mochiuh Huei cocoliztli, itoca quechpozahualiztli cenca ic michuac,

auh in yehuatl matlacxihuitl in tlatocat.