Ic caxtolli onnahui capitulo: ipan mitoa, in tlatecpanaliztli in tianquizco:
auh in yehuatl tlatoani, cenca quimocuitlahuiaya.
In tlatoani quimocuitlahuiaya ipan tlatoaya in tianquiztli,
ihuan ixquich tlanamactli, impampa cuitlapilli, atlapalli, macehualli,
ihuan ixquich ahua, tepehua in icnotlacatl, in motolinia,
inic amo quequeloloz, inic amo xixicoloz, inic amo ica necacayahualoz,
inic amo nexictiloz, inic motlacohuia,
in anozo itla quimonamaquilia quitecpanaya,
inic nononcua monamacaz, icecentlamantli tlanamactli,
zan iyeyan, zan ionoyan, amo ixneliuhtoca,
quimixquetzaya, in tianquizpan tlayacanque,
in quimocuitlahuiaya, in ipan tlatoaya in tianquiztli:
ihuan ixquich tlanamactli, icecentlamantli tlanamactli,
tiamictli, ipan manca, quimocuitlahuiaya cecentlamantin tlayacanque,
in innecuitlahuil catca, inic ayac texixicoz,
ihuan quenin tlapatiihuaz, quenin tlanamacoz.
Noncua onoca in quinamaca in coztic, ihuan iztac teocuitlatl,
ihuan chalchihuitl, ihuan teoxihuitl ihuan quetzalitztli, ihuan quetzalli,
ihuan xiuhtototl, ihuan tlauhquechol, ihuan ixquich nepapan totoihuitl,
tlazohtli in itech monequiya tlahuiztli chimalli.
Noncua onoca in quinamaca cacahuatl, huei nacaztli, tlilxochitl.
Noncua onoca in quinamaca huehuei tilmahtli, tlazotilmahtli,
tlamachyo tilmahtli, tlazomaxtlatl, tlamachcueitl, tlamachhuipilli,
cuachtli, ichtilmahtli, ayatl,
ihuan in ixquich cualoni, in tetech monequi, no noncua monamaca,
tlaolli iztac, yauhtlaolli xiuhtoctlaolli, coztic tlaolli,
coztic etl, iztac etl, tlilletl, chichiltic etl, zolcuicuiltic etl, ayecotli.
Nexhuauhtli, chichiltic huauhtli, michihuauhtli. Iztac chia, tliltic, chian,
chiantzotzol, iztatl: totolin, huexolotl, cihuatotoli, zolin, tochin, citli, mazatl,
canauhtli, atzitzicuilotl, pipixcan, tlalalacatl.
Necutetzahuac, cuauhnecutli, tonalchilli, atzitzihuacayotl chilli,
chiltecpin, texiochilli, chilcoztli, cohuixcayotl chilli, milchilli, huiyac chilli,
pochehuac chilli, miltomatl, xitomatl:
ihuan noncua monamaca, in izquitlamantli xochicualli.
Capolin, ahuacatl, mazaxocotl, xaxocotl, camotli, cuauhcamotli,
tezontzapotl, eyotzapotl, atzapotl, tzapotl, texocotl, nochtli, mizquitl,
itlaaquillo, chiancaca, cacomitl, cimatl, ayotlatlapantli, chayotli,
ayohuachtli, cuauhayohuachtli, ihuan iztac michin, cuiatl, axolotl,
ahuauhtli, axaxayacatl, tecuitlatl, izcahuitli, ihuan iztac cuauhamatl,
ihuan copalli, ihuan olli, ihuan tenextli, ihuan itztli, ihuan tlatlatilcuahuitl,
ihuan cuahuacatl, cuammimilli, huapalli, tlaxamanilli, huictli, huitzoctli,
tlateconi, ahuictli, matlacuahuitl, menelhuatl, ichtli, ihuan cuetlaxtli,
ihuan cactli, ihuan tepoztli, cuauhxeloloni, ihuan tepozcoyolomitl
ihuan tepoztli tlacuicuihualoni, ihuan tepoztlacuauhicuiloloni:
ihuan in ixquich tlamantli quilitl cualoni, xonacatl, tzayanalquilitl,
huitzquilitl, huauhquilitl, huauhtzontli, itzmiquilitl, quillanenel,
iztac xoxocoyolin, xoxocoyolhuihuilan, nopalli, xoconochtli, axoxoco,
ayoyacaquilitl, ayonanacatl, ayoxochquilitl, ezoquilitl, exotl, elotl,
xilotl, ooatl, miyahuatamalli, elotlaxcalli: ihuan in ixquich cualoni,
tlaxcalli, tamalli, necutamalli, necutlaxcalli, huei tlaxcalli, tlaxcalmimilli.
No ihuan oncatca, in tlayacanque in ipan manca acacuahuitl, acaiyetl,
iyetlalli, huel ocotzoio, ihuan xochiocotzotl, ihuan iyecaxitl,
ihuan apantlecaxitl, ihuan tlecuaztli, ihuan apaztli, ihuan xoctli,
ihuan atlalilcomitl, ihuan xayocomitl, ihuan comalli, ihuan molcaxitl,
ihuan in zoquitecomatl, ihuan in ixquich tlamantli zoquitlatquitl
Auh in yehuantin tianquipan tlayacanque, intlacamo quimocuitlahuia,
intequiuh, totoco, ihuan cahualtilo in intequiuh.
Auh intla aca tlachtectli quinamaca, azo tlazotilmahtli, anozo chalchihuitl,
intla oiximachililoc, intlacamo quinextiz in aquin quicohuili,
in tlein tlachtectli, quitzacutiuh, miquiya,
iuhqui tlatzontequiliaya, in tlatoque, tecutlatoque,
ic mimacahcia in tlein tlachtectli, ayac huel quicohuaya,
in intequiuh catca tianquizpantlaca quichihuaya iyahuitacatl,
in tlaxcaltotopochtli, ihuan pinolli, ihuan texhuatzalli, ihuan nextamalhuatzalli,
inic ipan tequitia tianquiztli, ihuan in tianquizpan tlayacanque,
in tlaixquetzalli oquichti, ihuan cihua in tequitlatoque catca.