ipan mitoa, in quenin quinpepenaya, in aquique tlatocatizque.
In tlatoani, inic ixquetzaloya, inic pepenaloya,
mocentlaliaya, mononotzaya, in tecutlatoque, inic quixquetzaya,
inic quipepenaya, in aquin tlatoani yez:
zan no iuhqui mocentlaliaya in achcacauhti, ihuan tequihuaque,
tiacahuan, oquichtin, ihuan tiachcauh tlatoque,
ihuan teopixque tlenamacaque, papahuaque
ixquichtin mocentlaliaya in oncan huei tecpan tlatocan,
inic mononotzaya, inic quipepenaya in ac yehuatl tlatocatiz,
quintenehuaya in ixquichtin tlazopipiltin in tlatoque impilhuan,
in oquichti, in tiacahuan in yaoc matini,
in amo quitlazotla in intzontecon, in imelchiquiuh,
in amo quiximati in octli, in amo tlahuanani,
in amo quimotequitia mixitl, tlapatl, in mimatini, in mozcaliani,
in tlamatini, in cualli yectli ïnezcaliliz, innehuapahualiz,
in huellatoa, in huellacaqui, in tetlazotlani, in ixe in iyollo.
Auh in icuac in omocencauh nenonotzaliztli, tlapepenaliztli,
in ocentet tlatolli, in ac yehuatl tlazopilli in huanoc,
in oixquetzaloc in tlatoani yez: niman no icuac ixquetzalo,
pepenalo in quipalehuizque, in itlan yezque in tlazopipiltin
in itecutlatocahuan yezque: motecutlalia, motocamaca:
tlacochcalcatl, huitznahuatlailotlac pochtecatlailotlac, ticociahuacatl:
in ye iuhqui in omocencauh tlapepenaliztli
niman nenonotzalo, tlein cualli cemilhuitonalli in ipan tlalilozque,
in opepenaloque: in tlatoani, ihuan in tecutlatoque,
ic tenahuatilo in iquin cenquixohuaz: ihuan nahuatilo in ixquichtin pipiltin
inic cenquizaquihui in iithualco huitzilopochtli:
auh in cequintin in pipiltinin quimacahci tlatocayotl motlatia minaya.
Inic ce parrapho: ipan mitoa, in quenin quinchichihuaya, in opepenaloque,
in ipan tlamacehuaya: ihuan quinhuicaya, in ichan Huitzilopuchtli.
Auh in ye iuhqui: in ocenquixoac, in icuac nahuatilli, in pipiltin
in tecutlatoque, in tiyachcauh tlayacatique, ihuan achcacauhti,
in onecentecoc, in yehuantin tecutlatoque:
niman quinnahuatia in teupixque, papahuaque,
inic quixtemozque inic tetzalan conanatihui:
in opepenaloc in tlatoani, quitocayotia in aquin,
ihuan quintocayotia in aquique tecutlatoque, oixquetzaloque:
niman ic ui in canazque, in teupixque papahuaque, in campa catqui,
oixquetzaloc tlatoani: niman quicuitihuetzi teixpan mochi tlacatl quitta:
niman ic quihuica imixpan tecutlatoque petlauhtiuh conaquia xicolli xoxouhqui,
ihuan quimamaltia iyetecon in imamaxoxouhqui:
niman ic conixtlapachoa, ic quicuaquimiloa nezahualcuachtli xoxoctic omicallo,
niman ic conmana icpaxiquipilli in oncan tentiuh copalli, omicallo xoxoctic:
ihuan conaaquilia yancuic in ipozolcac xoxoctic in iquequetzil,
niman imac contequilia, in itlema,
no miccatzontecomayo, inic tlacuilolli, amocuitlapile.
Auh in yehuantin, papahuaque teupixque:
caantihui in tlatoani in quitlecahuia ixpan huitzilopuchtli:
in icuac ocaxitique in tlatoani, in tlacpac, niman concui in copalli,
contema in tlemaco, in oncan yetiuh tlexochtli: niman ic cacocui,
in ixpan huitzilopuchtli, inic tlapopochuia
zan ic cuatlapachiuhticac: in nezahualcuachtli, omicallo.
Auh in ixquich macehualli, acopa conitztoc, tlapitzalo, mopitza in tecuciztli.
Auh in yehuantin tecutlatoque, tlacochcalcatl, huitznahuatlailotlac,
pochtecatlailotlac, ticociahuacatl:
niman no iciuhca quinchichihua, in teopixque papahuaque,
ceceyaca quimaquia tliltic ixicolli, ihuan imiyetecon,
tliltic in imama, ihuan quimaaquilia impocolcac iztac:
niman ic quimontlapachoa, quimonixquimiloa, cecenme,
ica nezahualcuachtli, tliltic omicallo,
ihuan quimonmaca icpaxiquipilli, tliltic omicallo,
in oncan temi copalli, ihuan intlema tlexochtli ontentiuh:
niman ic no quintlecahuia cecenme,
quintlacoaantihui in teopixque papahuaque,
inic quintlecahuia iicpac huitzilopochtli, inic cecenme concui in copalli,
contema in intlemaco, in oncan tentiuh tlexochtli,
cacocui in tlemaitl in iixpan huitzilopochtli quipopochhuia.
Inic ome parrapho: oncan mitoa, in quenin tlamacehuaya in tlapepenalti,
in ompa teopan: auh amo hualquizaya nahuilhuitl.
Auh in ye iuhqui otlenamacaque, otlapopochuique iixpan huitzilopuchtli:
niman ic quihualtemohuia in tlatoani, tlacatecutli,
tlapachiuhtiuh in ica nezahualcuachtli omicallo xoxoctic:
niman ic no ceceyaca quinhualtemohuia, in tecutlatoque,
zan ihuiyan tecpantihui, ic ixtlapachiuhtihui,
ceceyaca in ica nezahualcuachtli omicallo,
quintlacoaantihui in teopixque papahuaque,
quihuica quimonhuica in nezahualcalli, itocayocan tlacochcalco,
ihuan tlacatecco, in ichan huitzilopuchtli:
in oncan tlamacehuaya mozahuaya nahuilhuitl,
amo campa quiza, zan ehehuaticate: in icuac ye nepantla tonatiuh,
niman ic no ohui in teopixque papahuaque:
in oncan tlacatecco, in oncan mozahuaya tlatoani, ihuan tecutlatoque,
quimonana, quintlacoaantihui ixquimiliuhtihui, in ica nezahualcuachtli,
inmac onotiuh in intlema icecemme:
ihuan itlan cantiuh ceceyaca in iicpaxiquipil, in oncan tentiuh copalli,
zan ihuiyan tecpantihui, in quintlecahuia in icpac huitzilopuchtli,
inic ontlenamaca, inic ontlapopochhuia ixpan huitzilopuchtli:
zan no ihui inic hualtemo tecpantihuitce, ixtlapachiuhtihuitce,
in ica nezahualcuachtli omicallo:
quin icuac tlacua in tlatoani,
ihuan tecutlatoque za ceppa in tlacua cemilhuitl.
Auh yohualtica, in icuac yohualnepantla oahcic, mehua in tlatoani,
ihuan in tecutlatoque, ic ommotlapachoa in nezahualcuachtli:
ihuan concui in intlema ihuan icpaxiquipilli in oncan temi copalli,
ihuan huitztli, ihuan conmocactia in impozolcac:
auh in yehuantin teopixque papahuaque, quintlacoaantihui,
in quihuica, icpac huitzilopuchtli, inic ommizo
yohualnepantla, ihuan ontlenamaca, oncopaltema,
zan no ihui hualtemo tecpantihuitce,
quintlacoaana in teopixque papahuaque,
ic ixtlapachiuhtihui in nezahualcuachtli omicallo,
in ohualtemoque: niman ic hui in maltizque, in tlatoani, ihuan tecutlatoque,
inic yohualtica tlamacehuaya,
nahuilhuitl in mozahuaya ic ixquimiliuhticatca in nezahualcuachtli:
auh izquilhuitl in nepantla tonatiuh, in ontlenamacaya ixpan huitzilopochtli:
zan no izquiihual, in yohualnepantla tlenamacaya,
ihuan onmizoya in ixpan huitzilopuchtli, ihuan maltiaya.
Inic ey parrapho: ipan mitoa, in quenin quitzonquixtiaya tlamacehualiztli,
ihuan quihuicaya in tlatoani, in tecpan ithualco:
ihuan in oc cequintin quinhuicaya in inchan.
Auh in ye iuhqui in otzonquiz nahuilhuitl, ihuan nauhyohual,
in oonmozauh, in ontlamaceuh tlatoani
ihuan tecutlatoque, quin icuac quiza in tlatoani,
inic concahua in ompa huei tecpan tlatocan.
Auh in tecutlatoque, quin no icuac calaqui in inchan.
Auh in ye iuhqui: niman ic quipepena in tlatoani, in cualli tonalli,
in ipan motlatocapacaz, quinnahuatia,
in ixquichtin calpixque, in ixquich tilmahtli, ihuan tlazotlanqui tlahuiztli,
ihuan chimalli, in quitetlauhtiz, in quitemacaz.
Inic nahui parrapho: oncan mitoa,
in quenin quichihuaya tecuanotzaliztli, in yehuatl tlatoani.
Niman ic tecuanotza, in nohuiyan altepetl ipan,
quicuanotza in michoacan tlatoani, ihuan cuextlan tlatoani,
ihuan metztitlan tlatoani, ihuan totonacapan tlatoque,
ihuan tlaxcallan tlatoque, ihuan cholollan tlatoani,
ihuan Huexotzinco tlatoque, ihuan tenitla tlatoque,
ihuan tzapotlan tlatoque, ihuan anahuac tlatoque, ihuan tecuantepec
tlatoani: ihuan in ixquichtin tlatoque, ilhuicaatentli quitztoque,
ihuan in ixquichtin tlatoque in altepetl ipan, quiyahualotoque mexico,
tetzcuco tlatoani, ihuan tlacopan tlatoani.
Auh in icuac ocenquizque in ixquichtin tlacuanotzaltin tlatoque,
in iicnihuan tlatoqui, ihuan iyaohuan: niman ic quintlacualtia,
quinmaca in atl, in tlacualli, tlazotlanqui,
quintlauhtia in ixquich tlazotilmahtli, ihuan tlazomaxtlatl,
ihuan tlahuiztli, ihuan tlazotlanqui chimalli, netotilo, macehualo,
cuico, ceyohual, cemilhuitl, in tepaquiltia tlatoani:
auh in icuac no quintlauhtia, in ixquichtin pipiltin, tiacahuan,
ihuan tecutlatoque, ihuan achcacauhti, ihuan telpochtlatoque,
ihuan ixquichtin cuicanime, ihuan ixquichtin teupixque tlenamacaque,
tlamacazque: auh in otzonquiz tecuanotzaliztli,
niman ic ompehua in ixquichtin tlacuanotzaltin.
Inic macuilli parrapho: oncan mitoa, in quenin mocencahuaya in tlatoani,
inic cana yaotiz, altepetl ipan.
Auh zan niman iquezquilhuiyoc, yaotlatoa in tlatoani,
inic cana yaoquixhualotiuh, quintlauhtia in tlahuiztli tlazotlanqui,
ihuan chimalli im pipiltin, ihuan in ixquichtin tiacahuan, oquichtin
auh iyoma in tlatoani in yauh yaoc, in onyaoquiza,
in ontepehua quihuica in ixquichti yaoquizque,
ihuan in nohuiyan tlatoque altepetl ipan inic oyaoquiza, ontepehua:
auh in icuac ontepehuato, oyaoquizato cenca paqui,
in quexquich malli ocanato, inic mochintin ixpan huitzilopochtli quinmictiaya,
Auh in ixquichtin tiacahuan, tlamanime, quinmahuizyotia,
miyec tlamantli inic quimicnelia, quintlauhtia in tlazotilmahtli,
ihuan maxtlatl, ihuan tezacatl, ihuan tlalpiloni,
ihuan quintocamaca inic mahuiztililozque, inic tlacamachozque,