Florentine

Inic caxtolli omome capitulo, oncan mitoa in inneyehyecoliz in tlatoque:

in quenin huel quichihuazque intequiuh, in intlatocayo.

Inic ce parrapho: oncan mitoa, ihuan in tlatecpanaliztli,

in quititlania inic yaoquizaya.

In tlatoani, tlacatecutli, motocayotia: itequiuh catca in yaoyotl,

inic yehuatl quitzontequi, quitecpana, quicencahua, in quenin mochihuaz yaoyotl:

achto quinahuatia in tiachcahuan, in tequihuaque, in connemilia altepetl,

in conitta, in quezqui otli, in campa ohuica, in campa ye calachuaz, in ye iuhqui

achto oquinemili in tlatoani, tlapallacuilolpan omotlali in altepetl, in polihuiz,

ye onitztica in tlatoani in izqui vtli, in campa ohuican, quezquican

in calachuaz.

Niman ic quihualnotza: in tlacochcalcatl, in tlacateccatl,

in tiacahuan quinnahuatia, in iuh teomacazque

in quezquican calaquiz yaoquizqui, in quezquilhuitl monenemiz,

in quenin yaotecoz: ihuan quinnahuatia, inic yehuantin,

yaotlatozque quinnahuatizque: in ixquich in cuauhtlocelotl,

inic mochichihuaz, inic mocencahuaz: in ica yaoitacatl, ihuan tlahuiztli.

Auh in yehuatl tlatoani: niman quinnonotza in ixquichtin calpixque,

petlacalcatl, aztacalcatl: cuauhnahuac calpixqui, huaxtepec calpixqui,

cuetlaxtecatl: tochpanecatl: tziuhcoacatl, tepecuacuilcatl,

huappanecatl, coaixtlahuacatl, tlappanecatl, tlachcotecatl,

matlatzincatl, ocuiltecatl, xilotepecatl, atotonilcatl,

axocopanecatl, itzcuincuitlapilcatl, atocpanecatl, ayotzintepecatl:

quinnahuatia, inic quihualcuizque, in ixquich in inpiyel, in tlacalaquilli:

in tlazotlanqui tlahuiztli in coztic teocuitlayo, in quetzallo: in ixquich tlazochimalli.

Auh in icuac oquihualitquique in calpixque: in ixquich tlazotlanqui tlahuiztli:

iyehuatl tlatoani, niman quicencahua quintlahuizmaca in ixquichtin tlazopipiltin

in ye imixco ca yaotiliztli: ihuan in ixquichtin tiacahuan, in oquichtin,

in tequihuaque, in cuacuachicti, in otomi: ihuan in telpochnemi in pipilti:

auh in ye iuhqui, in otecencauh tlatoani, in tiacauh, in iuh oquichiuh.

Niman quinnahuatia in tlatoani: in ixquichtin calpixque,

inic intlatqui yetiaz: in ixquich tlazotlanqui, tlahuiztli:

ihuan in ixquich tlazotilmahtli, in ompa yaoc, in quinmacaz

in quintlauhtiz, in tlatoani: In ixquichtin tlatoque, ihuan in pipiltin

ihuan in tiacahuan, in oquichtin in yaotehuatoque,

in iuhqui ocelotenanti, cuauhtenanti mochiuhtoque: ihuan in tlatoani,

achto quinnotza in tlatoani tetzcoco, ihuan tlacopan:

ihuan in ixquich chinanpanecatl in tlatoque, quincaquitia,

inic yaotlatoa, inic polihuiz ce altepetl: quintlauhtia, in ixquich tlazotilmahtli,

ihuan quinmaca, in ixquich tlazotlanqui tlahuiztli.

Niman no ic quinnahuatia: in ixquich in imacehual, inic yaoquizatiuh:

impan icatihui in tiacahuan, in oquichtin, in tlacochcalcatl tecutli:

ihuan tlacateccatl,

tonatiuh itlatocahuan mitoaya,

quiyacana in quihuica yaoc, yacattihui in ixquichtin tlamacazque,

in teopixque, quinmama in inteohuan cemilhuitl quimitztihui,

in ixquichtin tiacahuan, in tequihuaque, no cemilhuitl quimitztihui:

in ixquich yaoquizqui in tenochcatl, no cemilhuitl quimitztihui,

in ixquich yaoquizqui tlatilolcatl: no cemilhuitl quimitztihui,

in ixquich acolhuacatl: no cemilhuitl quitztihui, in ixquich tepanecatl,

no cemilhuitl quitztihui, ixilotepecatl: no cemilhuitl quimitztihui,

in ixquich mocuataitoa: zan no ihui in oc cequi altepetl, motetecpana,

ihuiyan, yocoxca, in otlatoca.

Auh in icuac, oahcihuac (oaxihuac) teoatenpan, tlachinoltempan,

in yehuantin tiacahuan tlatlacochcalca, tlatlacatecca niman teomaca,

tetecpana, ayac huel tepanahuia, ayac huel tetlan quiza,

zan niman oncan quinmictia, quinhuihuitequi,

in aquin tlaixneloznequi: tetlan quizaznequi,

in oommoten ixquich yaoquizqui,

in ye inman in ohualhuetz Yacahuiztli, in tlaihualli inic tlayohualcuihuaz:

auh in icuac ye itech nequetzaloz, in altepetl polihuiz,

achto oc cenca mochiya in tletl, in quenman cueponiz:

inic tlecuauhtlaza tlamacazque: ihuan in tlapitzalli in tecuciztli,

in oquipitzque tlamacazque:

ihuan in ocuepon tletl, niman ic cemehua,
in ixquich yaoquizqui, motempapahuia, micali, quitlemina in teocalli.

Auh in achto in cahci malli in maliacatl, zan niman oncan, imixpan quimictia,

in teteo, tecpatica queltetequi.

Auh in icuac ompoliuh altepetl, niman ye ic nemalpohualo, in quexquich malli:

ihuan in quexquich omic mexicatl, in tlatilolcatl,

niman muchi quicaquitia in tlatoani,

inic tepal oicnopiltic Huitzilopochtli inic otlamaloc, ihuan omicuac:

auh in tlatoani niman quinnahuatia, in tecutlatoque:

inic quitemachtitihui, inic quitecaquititihui, in inchan in izquinti, oyaomiquito,

inic choquililozque in inchachan, in oyaomiquito:

ihuan quitecaquitia in inchan, in quezqui otlamato yaoc,

ic oncan quicuiya in mahuizyotl, in ipampa oquichyotl:

ihuan quimomacehuiaya in ixquich iteicneliaya in tlatoani,

in tlazotilmahtli, in maxtlatl, in atl, tlacualli, ihuan tlahuiztli,

ihuan tezacatl, nacochtli: oc cenca quimicneliaya in tlazopipiltin

in tlatoani intla otlamato, quimaca calpixcantli:

ihuan in ixquich tlazohtli necuiltonolli, in mahuiczyotl, in tleyotl, in teyotl.

Auh intla acame quitlacoa yaoyotl,

niman ompa quinmictia in yaoc quinhuihuitequi, quintetepachoa.

Auh intla acame, quimocuicuilia ce malli, quitoa ce tlacatl, ca nomal,

in oc ce tlacatl no quitoa ca nomal: intlacamo ce tlacatl itech nelti,

ayac no quimittac, in quenin tlamaque:

yehuantin quintlatzontequilia, in tonatiuh itlatocahuan:

ayac tle onquiza in imomextin in quimocuicuilia in malli:

iuh quitzontequi, in cuauhtlatoque, in mallatoque,

ayac ce itech pouhqui yez in malli:

huitzcalli quipoaya, calpolco quicahuaya, in ichan tlacatecolotl.

Auh in icuac oaxihuac altepetl in oompoliuh, niman icuac motlalia in tequitl,

in tlacalaquilli itech mana in tlein ompa mochihua, auh niman

no icuac ixquetzalo in calpixqui, in quimocuitlahuiz, in ipan tlatoz in tlacalaquilli.

Inic ome parrapho: ipan mitoa, in quenin quinpepenaya ijueces.

In tlatoani oc cenca quimocuitlahuiaya in tetlatzontequililiztli,

quicaquia in ixquich in ineteilhuil: ihuan in ichoquiz,

in inentlamachiliz in inetoliniliz in cuitlapilli, atlapalli in icnotlacatl,

in motolinia in macehualli:

auh inic huel quineltiliaya in tlatoani in teneteilhuil

anozo tetlatlacol quimixquetzaya,

quinpepenaya in itecutlatocahuan: yehuantin in tlazopipiltin

in tlayecoltilo in oncan in quini, in quicuani, in mocuiltonoa,

ihuan tiacahuan, oquichti, in yaoc omozcaltique,

miyec tlamantli tecoco netoliniliztli, oquimahuizoque:

auh in izqui tlamantli cualli nehuapahualiztli, nezcaltiliztli.

in inpiltiyan oquimomachtique, in calmecac nehuapahualiztli,

in tiachcapa nehuapahualiztli, in tetlan nehuapahualiztli,

in calpan tetlan nemiliztli, yaoquizaliztli, tlamaliztli.

Auh zan no iuhqui: inic quinpepenaya tlatoani,

inic quimixquetzaya in tecutlatoque, in mexica,

in amo pipiltinyehuantin in cualli yectli, innehuapahualiz, innezcaltiliz,

in yaoc omooapauhque, in tiacahuan in oquichti,

in miyec tlamantli oquimahuizoque, iteicneliliz tlatoani, w

in ipal atli, tlacua, in quinpaquiltia, in quintlauhtia,

ihuan in quinmaca,in ixquich intech monequi:

iuhque in in quimixquetzaya,

in quinpepenaya tlatoani, in itecutlatocahuan, in mimatini,

in mozcaliani, in tlanemiliani, in huellacaqui, in huellatoa, in motlayollotiani

in amo ahahuillatoa, in amo cacamanaloa, in amo ilihuiz moocniuhtia,

amo tlahuanani, cenca quimahuizpiya in tecuyotl, amo cochini,

cenca cochizani amo tle quicniuhchihua: amo tle quihuayolcachihua:

amo tle quitecocolicachihua, amo tlaxtlahuiltica quicaqui, anozo quitzontequi:

quimiquiznahuatiaya, in tlatoani:

inic melahuac quichihuazque in intequiuh, in tecutlatolli:

auh intlacamo, ca yehuantin conmotzacuilitiazque in tecutlatoque,

in tlein quitlacozque.

Auh in icuac, oquimixquetz in tlatoani: in itecutlatocahuan

quinmacaya ontetl in tlatocacalli, in teccalli,

in oncan yezque, in oncan tetlatzontequilizque,

in oncan quicaquizque in ixquich tlamantli tlacatlatolli,
in centetl teccalli itoca tlacxitlan,

in oncan tetlatzontequiliaya tlazopipiltin tlatocapipiltin

zan niman iciuhca quitzontequia inteneteilhuil, anozo tetlatlacol.

Auh inic occan tecutlatoloya, itoca teccalli, oncan catca in tecutlatoque mexica:

Ihuiyan yocoxca quicaquia, in ineteilhuil cuitlapilli, atlapalli, in oquichipauhque,

in oquiyectilique neteilhuilli, tlapallacuilolpan quitlalia,

inic ompa quitqui tlacxitlan in ipan quintlapohuilia in tecutlatoque in tlazopipiltin

inic ompa motzontequi.

Auh intla itla ohuilitica ihuic quitqui in tlatoani

inic yehuantin quitzontequi in intoca catca tecutlatoque.

Cihuacoatl tlacochcalcatl, huitznahuatlailotlac,

ticociahuacatl, pochteca tlailotlac, ezoahuacatl, mexicatl

tezcacuacatl, acatliacapanecatl, milnahuatl, atlauhcatl,

ticociahuacatl, cihuatecpanecatl, tequixquinahuacatl, yehuantin,

y, in tecutlatoque quinemiliaya, quichiquia, quipetlahuaya in tlacatlatolli,

quintemoaya in machiceque, in tlaneltiliani, in azo ye nelli,

anozo tlatolchichihualli in caquitilo tlatoani,

in azo can tlapic aca cuauhcalco otlaliloc.

Auh intla aca quitlatzontequilia tlatoani miquiz, niman quimictia,

in itemicticahuan achcacauhti, cuauhnochtli, atempanecatl:

inic yehuantin quimictia, quimecania in tlatlacoani,

anozo teixpan quitetepachoa, anozo quitetequi.

Inic ei parrapho: ipan mitoa in quenin netotiloz.

In tlatoani oc cenca quimocuitlahuiaya in macehualiztli,

in papaquiliztli: inic quimellacuahua,

inic quinyollalia, in ixquichtin tlatoque, ihuan pipiltin ihuan tetecuti,

ihuan tiacahuan: ihuan in ixquich in cuitlapilli, atlapalli, in macehualli:

achtopa quitoaya in tlatoani, in tlein cuicatl mehuaz,

quinnahuatiaya in cuicanime: inic quiyehecozque inic quichicahuazque in cuicatl,

ihuan teponaztli, olmaitl, huehuetl: ihuan in ixquich macehuallatquitl,

ihuan netotiliztli, aquin cuicaitoz, aquique in teyacanazque,

aquin teponazoz, aquin huehuetzonaz,

mochi achto mocencahuaya inic atle itlacahuiz.

Auh in ye icuac macehua tlatoani, in tlein ilhuitl ipan mocencahua,

mochichihua quetzallalpiloni coztic teucuitlayo, inic quilpia itzon, Coztic tezacatl,

anozo chalchiuhtentetl in conaquia itenco, coztic teucuitlanacochtli,

in caquia inacazco: auh in cozcatl conteca, azo chalchiuhcozcatl,

anozo cozcapetlatl, teuxihuitl itlaactoc,

macuextli imac quitlalia huei chalchihuitl ipan ca anozo huei teoxihuitl,

anozo coztic teucuitlamatemecatl, quetzalecacehuaztli,

tlazotlanqui inic mitotia inic macehua, tlazotilmahtli in quimololoa,

in quimoquentia, tlazomaxtlatl in quimomaxtlatia,

niman ic no quicencahua quintlauhtia: in ixquichtin tlatoque,

ihuan pipiltin in oquichti, tiyacahuan, ihuan tecutlatoque,

ihuan achcacauhti, ihuan tiyacahuan oquichtin,

ihuan tiachcahuan, ihuan cuicanime:

ihuan quinmaca in iauh, in itlacual tlatoani

in izquitlamantin omoteneuhque.

Auh intla itla quitlacoa cuicanime: azo teponaztli quichalania,

anozo huehuetl, anozo cuicaitoa, quipoloa cuicatl: anozo teyacana,

in quipoloa netotiliztli: niman tlanahuatia in tlatoani,

cuauhcalco contlalia in aquin tlatlacoa, quitzacutiuh miquia.

Inic nahui parrapho: oncan mitoa inic ixtozoaya in aquin tlatoani,

inic tlapiaya in yohualtica: ihuan in cemilhuitl in ipanpa yaoyotl.

In tlatoani oc cenca quimocuitlahuiaya in yaotlapiyaliztli,

ihuan altepepiyaliztli, cemilhuitl ceyohual,

ic tlatlacuauhnahuatiaya, inic cenca tlapiyaloz:

ma quenmanian atenemachpan yaoyahualolo in altepetl mexico,

azo cana ica necentlalilo, tlachichihuililo,

ipampa cenca ixtozoaya in tlatoani, amo tlahuanaya,

iyoma in yohualtica quenmanian quizaya quiyahualoa in altepetl
quitta tlein muchihua, acazomo tlapiya in tlamacazqui in tiachcauh

azo ye necuitlahuilo in mixitl in tlapatl in octli:

ihuan oc cenca quintlacuauhnahuatiaya in tlatoani in ixquichtin yaotehuaque

in tlatoque icemilhuitl iceyohual tlapiazque,

in teoatenpan in tlachinoltenpan, in quimocuitlahuizque ocelotenamitl,

cuauhtenamitl, in yaootli: ihuan quimanazque quintzitzquizque

in tetlan nenque in ichtaca hualcalaqui in quihualnemilia altepetl,

ihuan huallapiya in iquin yaotlatoloz,

auh in oquicacque ca ye yaotlatolo:

niman calactihuetzi in connonotza intlatocauh,

inic niman no mocencahua yaotlapializtica.

Auh intla ano tetlanenque, mictilo, tetzotzonalo inca nenonotzalo.

Auh intla macho, ca acame quimati in mexica in inchan hualmocallotia,

in tetlanenque in iyaohuan no quitzacutihuia,

inca nenonotzaloya in chaneque, ihuan in inpilhuan,

ihuan namoyeloya in intlatqui atle neneciya in inchan.

Auh zan no iuhqui cenca ipan tlatoaya in tlatoani

inic cenca tlapialoz in iitic altepetl, icemilhuitl, ceyohual,

in ma aca quitlachichihuili altepetl, in ma yaoyahualolo quenmanian,

auh inic icatiaz tlatoani, ihuan altepetl quinnahuatiaya

in tlatoani in telpochtlatoque, in tiacahuan:

ihuan in ixquich telpochtli, inic momoztlae yohualtica cuichuanozque,

inic quihualcaquiz ixquich altepetl, in quiyahualotoc mexico:

ca amo cochi in tlatoani, ihuan ixquich mexicatl.

Auh in icuac tlacuauhtlapoyahua: niman tlapitza,

ihuan teponazohoa, in tlamacazque tenochca, ihuan tlatilolca:

ihuan ixquich altepemaitl, icuac quiza in ixquichtin tlamacazque

nohuiyan in ontlamacehua nohuiyan tepeticpac,

ihuan ic ontlapiya in azo itla quinamiquitihui ye tlathuinahuac

In hualcalaquiya inic ontlapiyaya ceceyohual iuh quichihuaya.

Auh in huei tecpan in tlatoca, zan no iuhqui ceyohual in tlapialoya,

aquenman cehuia in tletl: ceyohual in tlapiyaloya, ihuan tlahuiloya ocotica,

in oncan iyeyan tlatoani, ihuan tlacxitlan, ihuan teccalli,

ihuan tecpilcalli, cuauhcalli, achcauhcalli, cuicacalli, ihuan coacalli,

in intenetlaliayan tlatoque altepetl ipan, ihuan calmecac,

ihuan texancali in innecenquixtiaya calpixque, ihuan telpochcalli,

in nohuiyan tlatlaxilacalpan mamani:

oncan icacaltemi in telpopochtin in tlapiya,

ayac ichan oncochiya, intequiuh catca in telpopochtin,

in cuauhtla yaliztli, inic tlapiyeloya iitic altepetl

inic ceceyohual tlahuiloya tlatlatiloya, inic tlapiyeloya.

Inic macuilli parrapho: ipan mitoa, in quenin mellelquixtiaya, tlatoani.

In tlatoani in icuac quittaya,

quimatia ca cenca nentlamati in cuitlapilli, atlapalli macehualli:

niman tlanahuatiaya, inic ollamaloz, inic teellacuahuaya,
inic tepaquiltiaya tlatoani: quinnahuatiaya in calpixque,

inic quihualcuizque in olli, ihuan nelpiloni, ihuan quecehuatl,

ihuan mayehuatl: inic mocencahua inic mochichihua, in iollancahuan tlatoani,

ihuan tlacencahualo in tlachco,

tlaahuililo, tlaxaluilo, tlachpano:

ihuan in ixquich quitlanitoz tlatoani,

in tlazotilmahtli in xomoihhuitilmahtli, in tlazomaxtlatl, in chalchiuhtentetl,

teocuitlanacochtli, chalchiuhcozcatl, teocuitlacozcatl,

matzopetztli chalchihuitl huei ipan ca, tlazotl: ihuan in ixquich tlazotilmahtli,

ihuan pepechtli quihualquixtia in calpixque, quihuallalia in tlachco.

yehuantin quinamiquizque, in collamizque tlatoani:

niman ic tiamictia, in ixquich itlatqui tlazohtli:

auh in ye ix motolinia macehualli,
iceceyaca contlalia tlatoani ica iyayazol in iuhqui quiquemi macehualli.

Auh intla oquitlanque tlatoani:

niman tepatla, in calpixque quitema in ixquich tlazohtli tlatquitl, in oquitlanilique tlatoani:

auh in macehualti no quinmaca in ixquich oquitlanilique tlatoani.

In tlatoani, in icuac quinequiya iyellelquizaz tlanahuatiaya inic patoz,

micuiloa ce patolpetlatl, ica tlilli, papatlactic in tlaxotlalli ic micuiloa,

in oncan nepohualo ic netlanihua:

auh niman no mixcoionia nauhtetl ayecotli, inic patolo inic netlanihua:

auh zan ye no iuhqui quichihuaya in calpixque,

inic mochi tlazohtli in itlatqui, in iaxca tlatoani,

quihualteca in oncan patoloyan, in qui tetlanitalhuia in tlatoani,

auh in icuac, intla otlanihoac tlatoani, niman tepatla in calpixque:

ihuan quipatla in ixquichtin macehualti, in ocontlalica tlatoani in patoloya.

Inic chicuacen parrapho:

oncan mitoa, in aquin tlatoani cualli iyollo, teicnoittani.

In tlatoani, cenca tetlaoculiani, cenca teicnoittani, ihuan teicneliani,

in icuac quinequia , quizaz in otli quitocaz: in aquin motolinia macehualli,

in motlapaloa, inic quitlapaloz tlatoani, intla ohuelquitlapalo in tlatoani:

niman quinahuatia in calpixqui, quimacaz tilmahtli, maxtlatl, ihuan icochiya,

ihuan in quiz, in quicuaz, tlaolli, etl, huauhtli.

Auh intla motoliniani cihuatl motlapaloz quitlapaloz tlatoani,

zan no iuh quicnelia, quitlauhtia in ihuipil, in icue, icochiya, in quiz,

in quicuaz tlaolli, etl, huauhtli.

Auh intla aca motolinia, icnotlacatl, oquichiuh, oquitlali,

quezqui huehuetl mahuizyo cuicatl, intla niman itech quipoa tlatoani,

intla quimaca, cenca quicnelia, quitlaocolia, quicalmaca quicuiltonoa,

quimaca in quexquich tlatquitl in iitic onoc calli,

ihuan quimaca calpixqui inic momoztlae quimocuitlahuiz quitlacualtiz,

quitenixitiz, quineuhcayotiz quicochcayotiz:

ihuan quimaca in ixquich netlauhtilli in tlazotilmahtli,

in pepechtli in necuiltonolli, cihua, ihuan tlacotli, ihuan mahuiciotl.