Inic 14 Capitulo
Oncan mitoa in tecpancalli in tlatocacalli,
Huey tecpan in oncan ca tlatoani, ixquich tlacatl oncan tecpanoa
Oncan motzontequi in tlein tequitl, anoce yaoyotl
Ihuan oncan atlihua tlacualo, inic onca tecenquixtia tlatoani
Inic ce parrapho Ipan mitoa in oncan tlatoloya in audiencia
in icuac itla itlacahuiya in aquique tlatlacoa,
oncan quintlatzontequiliaya Tlacxitlan,
oncan catca tlatoque tlazopipiltin tecutlatoque:
in ixquich tlamantli in ineteilhuil cuitlapilli atlapalli macehualli:
onca quicaquiliaya, oncan quitlatzontequiliaya:
ihuan ixquich tlamantli miquiztli oncan quitzontequia
azo aca quimecanizque, anozo aca quitetepachozque,
anozo aca cuauhtica miquiz quihuihuitequizque,
anozo aca pilli, anozo tecutlato, ximaloz,
totocoz, callaliloz, macehualcuepaloz,
anozo aca ilpiloz cuauhcalco tlaliloz:
ihuan oncan quintlatlacollazaya, in tlatlacotin.
Tlatocati in motecuzuma, oxihuitl in mayanaloc, in pipiltin miyequintin,
in quinnamacaque in intelpochhuan, ihuan in imichpochhuan,
in icuac in oquicac motecuzuma:
tlanahuati inic nechicolozque, in ixquichtin tlazotipipiltin
ihuan notzalozque in intecuiyohuan,
inic macozque, inic cuepililozque in intlatqui. Huehuei tilmahtli,
ihuan cuachtli, ihuan tlaolli, inic quimpatiotica pipiltin,
ihuan oppamixtlapan inic quintlaxtlahuili, inic quintlatlacollaz pipiltin.
In oncan in tlacxitlan amo tle huecahuaya in neteilhuilli,
zan niman iciuhca motzontequia,
in tlein oncan caquitiloya tlatoque atle quicniuhchihuaya
atle tlaxtlahuiltica quixpachoaya, anozo quihuecahuaya.
Inic ome parrapho, itechpa tlatoa in audiencia in tlatoloyan
in oncan tlatoaya tecutlatoque.
Teccalli, teccalco, oncan catca in tecutlatoque, in tetecutin,
in momoztlae imixpan moteilhuiaya, cuitlapilli atlapalli macehualli,
ihuiyan yocoxca, in quicaquia in inneteilhuil macehualli:
tlapallacuilolpan in quipoaya, in quittaya neteilhuilli:
auh inic quineltiliaya, quintemoaya, quimitlania in machiceque,
in tlaneltiliani, in quimachilia moteilhuique,
in tlein quimocuicuilia, in tlein ipan moteilhuia.
Auh in tlatoani, intla itla quinmachili: in yehuantin tecutlatoque,
azo zan tlapic quihuecahua, in ineteilhuil cuitlapilli,
anozo ye nauhxihuitl quinemitia in amo huel quitzontequi,
azo zan ipampa tlaxtlahuilli, anozo huayolcayotl:
niman quimilpia, cuauhcalco quintlalia,
quitzacutihui, quimictia, inic mauhca yezque tecutlatoque.
Tlatocati motecuzuma, miyec tlamantli in quinmachili
tecutlatoque mixcoatlailotlac, teicnotlamachti, tlacochcalcatl,
iztlaca mixcoatlailotlac, omaca, tocual, huictlolinqui,
tlatilolca in amo melahuac quichihuaya in intequiuh tecutlatolli:
niman quimilpi, cuauhcalco quintlali, quitzacutiyaque, quinmicti.
Inic ei parrapho: oncan mitoa in tlatoloyan,
in oncan catca in tiacahuan, ihuan in pipiltin.
Tecpilcalli, oncan catca, oncan tecpanoaya in pipiltin,
tiacahuan oquichti, in yaocmatini, in tlatoani intla aca itla quimachili pilli,
in manel cenca tlazopilli tiacauh intla otetlaxin, niman quitlatzontequilia,
inic teixpan tetepacholo tetica miqui
ce tlacatl tlazopilli itoca Huitznahuatl ecamalacotl tetlaxi in oconteixpahuique
ixpan motecuzuma, niman quihuallatzontequili, inic teixpan tetepacholoc.
oncan mitoa in innenonotzayan tiacahuan in ipampa yaoyotl.
Tequihuacacalli, cuauhcalli, oncan catca in tiacahuan tlacochcalcatl,
tlacateccatl, in inneixcahuil yaotequitl.
Achcauhcalli, oncan catca in achcacauhti
in tiacahuan in itemicticahuan catca tlatoani
yehuantin quitzonquixtiaya in aquin tlein ipan omotzontec,
cuauhnochtli, atempanecatl, tezcacuacatl,
auh in itla quitlacoaya, quitzacutihuia miquiya.
Cuicacalli, oncan catca in tiachcahuan, in telpochtlatoque oncan tlatecpanoaya
inic quichiaya tlein tequitl, auh in momoztlae,
in icuac ye calaqui tonatiuh: tlamacehualiztli ipan quimatia,
zan petlauhtihuia, inic huiya cuicacalli,
inic oncuicuanohuaya zaniyo inquech in onactihuia,
iuhquin matlatl ic tlachiuhtli, imaztaxel conmantihui,
tochacatl inic quilpia intzonchichilicpatl: ihuan ixiuhnacoch, ihuan intempilol eptli,
ixquich in telpochtli in oncuicuanoya icuac necahualoya
in tlacuauh tlapoyahua,
in icuac yancuican tlapitzaya tlenamacaque tlamacazque,
amo ac ichan calaquia, amo ac ichan oncochiya, ca niman ompa tlamelahuaya,
in nohuiyan telpochcalli mamanca: in oncan cochiya, zan pepetlauhtoca,
zan achi in concochiya, momoztlae in oc yohuan quiza in ontecpanoa,
in ichan tlatoani.
Auh in icuac itla quinmachilia in tlatoani, azo tlahuanaliztli,
anozo nemecatiliztli, anozo itla icampa quiquixtia, in tlatoani:
in amo itencopa, itla quitetequitia in calla azo atl,
tlacualli tequipan yecahui, moyocoya, quitetequitia inic intech monequi,
niman tlanahuatia in tlatoani, cuauhcalco quintlalia, quintlatzontequilia,
inic quitzacutihui, azo quinmecania, anozo quintetepachoa,
anozo cuauhtica quinhuihuitequi teixpan, inic mictilo,
inic mahuiztli quiteca tlatoani.
Ic macuilli parrapho: oncan mitoa, inic quipiyaya in ixquich cualoni.
Petlacalco, oncan mopiyaya, in ixquich cualoni,
in tlaolli inic mopiyaya cuauhquezcomatl, amo zan macuiltzontli, oncatca tlaolli:
cempohualxiuhcayotl, in itetzon altepetl,
ihuan cuauhcuezcontica mamanca in etl, in chian, in huauhtli, in chiantzotzol,
iztacomitl, in oncan quimilpiaya, quincaltzacuaya tlatlaztaxalli,
chilpetlatl, ayohuachpetlatl, cuauhayohuachtli:
ihuan oncan mopiyaya in teilpilcalli, cuauhcalli, huani.
Ic chicuacen parrapho, oncan mitoa: in inchan mayordomos in calpixque.
Calpixcacalli, texancalli, oncan cenquizaya: in ixquich calpixqui,
ihuan tequitqui, oncan tecpanoaya inic tlein quitemoz quicencauhti catca,
in tlein inpiyel tlacalaquilli, in momoztlae quimacaya tlatoani.
Auh intla tlatoani, itla quimachili, ce calpixqui,
azo itla quinahualchihua tlacalaquilli: ihuan in ixquich in ipiyel, in tlacalaquilli:
acazomo cahci in tlapohualiztli: in icuac mopohua, mocxitoca, in ixquich in ipiyel:
niman cuauhcalco quitlalia, in calpixqui:
quitzacutiuh, miqui, niman quinquixtia, in icihuahuan:
niman iciuhca motzacua, in ical calpixqui:
ihuan in ixquich in itlatqui, calitic onoc: moch itech compohua tlatoani.
Cuacalli oncan tecpanoaya, in ixquichtin, nohuiyan tlatoque:
in iicnihuan tlatoani, ihuan in ixquichtin, iyaohuan tlatoque:
quinmacaya, quintlauhtiaya, in ixquich tlazohtli, in tlazotilmahtli,
in tlazomaxtlatl, in teocuitlatentetl, in teocuitlanacochtli, in chalchiuhtentetl,
in chalchiuhcozcatl, in chalchiuhmacuextli.
Inic chicome parrapho, oncan mitoa: inic mocencahuaya cuicanime,
in tlamacehuaz tlatoani: ihuan in tlein ipan mitotizque.
Mixcuacalli, oncan tecpanoaya in izquitlamanti,
macehualcuicanime in tenochca, ihuan tlatilolcatl,
oncan quitlatolchiaya in tlatoani, in azo macehuaz,
azo itla cuicatl quiyehyecoz, azo itla yancuic cuicatl quimomachtiz,
mochi ic mocencauhticatca, in cuicanime:
in ixquich monequi teponaztli, olmaitl, huehuetl, ayacachtli, tetzilacatl, zozoloctli,
teponazhuani, huehuetzonani, cuicaithuani teyacanque:
ihuan in ixquich tlamantli macehuallatquitl,
intla huexotzincayotl mehuaz cuicatl,
in iuh mochichihua huexotzinca, ihuan in iuh tlatoa:
motlayehyecalhuia in ica cuicatl: ihuan ica inechichihual intlatqui.
Zan no iuhqui intla anahuacayotl mehuaz, motlayehyecalhuia,
in intlatol anahuaca: ihuan in innechichihual in iuhqui intlatqui.
Zan no iuhqui, intla cuextecayotl mehuaz cuicatl,
motlayehecalhuia in intlatol: ihuan mocui tzoncalli in quintlayehecalhuia,
intzon,inic cuacoztique, ihuan xayacatl ixtlamihua yacahuicole, tlantzicuatic,
cuapatlachtic, izan itilma, Can no iuhqui in oc cequi cuicatl.
Inic chicuei parrapho, ipan tlatoa, in inchan catca tlatlacotin.
Malcalli: calpixque quinpiyaya, in mamalti, cenca quinmocuitlahuiaya,
in tlacualtica, in atica: in tlein quinequiya, mochi quinmacaya in mamalti.
Totocalli, calpixque oncan quinpiyaya; in ixquich nepapan tototl:
cuacuauhtin, tlauhquechol, zacuan, tozneneme, cochome, alome, coxolihtli:
ihuan oncan tlachichihuaya, in ixquich nepapan toltecatl, in teocuitlapitzqui,
in tepozpitzqui, in amanteca, tlacuiloque, tlatecque, chalchiuhtlacuiloque,
cuauhtlacuiloque Tecuanpixque, calpixque, oncan quinpiyaya,
in ixquich tecuani: ocelotl, cuetlachtli, miztli, ocotochtli.