Inic matlactlomome capitulo,
oncan mihtoa, inic mochichihuaya in tlatoque, in quititlania yaopan
Tlauhquecholtzontli tlazotlanqui coztic teocuitlayo
Cenca miyec in quetzalli icuecuetlacacayo
Ihuical in tlamamalli, huehuetl in colotli tlachiuhtli, coztic teocuitlayo
Auh in yehuatl commaquia tlatlauhqui, tlauhquecholihuitl inic tlachiuhtli
Coztic teocuitlatl in itetecpayo,
auh in itzapocue mochiuhtoc zan moch quetzalli
Chimalli, coztic teocuitlatl, in tlatzotzontli imanahuayo,
tlazoihuitl in itentlapilollo mochiuhtoc
Chalchiuhcozcatl, tlacenquixtilli in ololiuhqui,
in huehuey chalchihuitl, ihuan teoxihuitl
Xiuhtototzontli, coztic teocuitlayo, quetzalli in icuecuetlacacayo
In itzontecon conmaquia tlatoani;
auh in itlac conaquia xiuhtotoehuatl
Auh in tlamamalli xoxouhqui huehuetl in colotli tlachiuhtli coztic teocuitlayo
Zan much quetzalli in itzapocue, mochi tlazoihuitl in itlapilollo,
Coztic teocuitlatl in tlacanahualli in itetecpayo, in xiuhtotoehuatl
Ocelototec, oceloehuatl inic tlachiuhtli,
coztic teocuitlatl inic tlachiuhtli in itetecpayo
Za much quetzalli in itzapocue,
ocelohuehuetl in tlamamalli coztic teocuitlatl inic tlotlohuitequi
Chimalli xiuhtototica tzacqui, coztic teocuitlatl ic itixapo
Quetzalpapalotl in tlamamalli,
inamic tocehuatl, coztic teocuitlatl inic tlotlohuitecqui
Chimalli teocuitlatica itixapo, teocuitlapapalotl ihtic mani
Quetzalxopilli, coztic teocuitlayo, tocehuatl in yehuayo
Coztic teocuitlacuacalalatli, iquetzalcuacuauh, yehuayo coztic tocehuatl.
Iztac teocuitlacuacalalatli, quetzaltecomayo,
inamic tocehuatl coztic teocuitlatl ic tlotlohuitecqui
Quetzalpanitl tlacochcalcayotl. Iztac teocuitlapanitl, quetzaltzontecomayo
Coztic teocuitlapanitl, quetzaltzontecomayo
Itzpapalotl tlazotlanqui quetzallo, coztic teocuitlayo
In itlan, in yizti mochi tlazoihuitl; iquetzalcuacuauh
Xochiquetzalpapalotl, tlazotlanqui in tlazoihuitica
Ihuan coztic teocuitlayo, iquetzalcuacuauh
Quetzalpatzactli, xiuhtotoehuatl ihuicallo in chimalli xiuhtototica tzacqui
Tozcuaxolotl iquetzaltemal, coztic teocuitlayo, tocehuatl inamic,
Coztic teocuitlatl inic motlotlohuitec
Xoxouhqui cuaxolotl, quetzallo coztic teocuitlayo in inamic xoxouhqui ehuatl
Iztac cuaxolotl, quetzallo, coztic teocuitlayo in inamic iztac ehuatl
Chichiltic cuaxolotl, quetzallo, coztic teocuitlayo, in yehuayo, zan no chichiltic
Zacuantzontli, quetzallo, coztic teocuitlayo tocehuatl inamic
Toztzitzimitl: mochi coztic teocuitlatl inic tlachiuhtli, quetzallo, iquetzaltemal
Xoxouhqui tzitzimitl, quetzallo,
Muchi coztic teocuitlatl inic tlachiuhtli, iquetzaltemal
Iztac tzitzimitl, coztic teocuitlayo, iquetzaltemal
Coztic cuextecatl icopil huitzauhqui, ixcuateocuitlayo, quetzaltica cuitlalpic
Auh in ehuatl, tocehuatl motlotlohuitec, coztic teocuitlatl in iyacametz,
ipipilol, coztic teocuitlatl, imamalacaquetzal
Iztac cuextecatl imacal huitzauhqui, quetzaltica cuitlalpic,
Ixcuateocuitlayo, imamalacaquetzal teocuitlayo
Coztic teocuitlatl in yacametz, ipipilol coztic teocuitlatl
Chictlapanqui cuextecatl, cectlapal xoxouhqui, cectlapal coztic in ehuatl,
icopil huitzauhqui, no chictlapanqui, cectlapal xoxouhqui
Cectlapal coztic quetzaltica cuitlalpic, Ixcuateocuitlayo,
coztic teocuitlatl in iyacametz, ipipilol coztic teocuitlatl, imamalacaquetzal
Coztic teocuitlacopilli quetzaltecomayo, iztac teocuitlacopilli quetzaltecomayo
Tlapitzalli tecuciztli, ihuan quiquiztli in mopitza yaoc inic cemehua yaoquizque,
inic micali: In cuachpanitl, coztic teocuitlapanitl:
ihuan quetzalpanitl in teehuitia in yaoc,
in omottac ye mehuatiquetza in izqui cuachpanitl.
Niman cemehua in yaoquizque, inic micali
Quetzaltonatiuh, coztic teocuitlatl in tonatiuh
ihtic mantiuh in quetzalli yahualtic.
Xiloxochipatzactli, quetzalli in yizhuayo, coztic teocuitlatl in itecpayo,
in icanahuacan mamantiuh: coztic teocuitlatl in tlacomaltectli.
Macuahuitl itztzo in itenco tlatectli,
quetzalaztatzontli, teocuitlayo, quetzalxixilqui:
auh in icuecuetlacacayo miyec quetzalli,