Inic matlactli capitulo, ipan mihtoa inic meellelquixtiaya tlatoque
In icuac quiza tlatoani, imac onotiuh, yacapitzac,
inic mapilotiuh, inic matlatotiuh
quiyacana in itechiuhcahuan, in itahuan,
necoc omac in mantiuh in quitlapehuilitiuh:
ayac huel quiyacahuiltequi, ayac huel ixpan quiza,
ayac huel acopa quitta, ayac huel quixnepanoa
Cuica, mocuicamachtia, cuicaehehua, quitlatlaquechilia, quizazanilhuia
Ollama, oncatca imolpixahuan, ihuan inmolancahuan
Quitlanitoa in ixquich tlazohtli in teocuitlatl, in teocuitlacozcatl,
in chalchihuitl, in teoxihuitl, in tlazohtli, in tlazotilmahtli, in tlazomaxtlatl,
in milli, in calli, cotzehuatl, teocuitlamatemecatl, quetzalmachoncotl,
xomoihhuitilmahtli, cacahuapetlatl in oncan netlanihua, itoca tlachtli
Necocampa imac tlatepantectli,
cenca tlayecchiuhtli inic xipetztic in tlachmatl, ihuan in tlalmantli:
auh in oncan huel inepantla tlachtli, onoca tlecotl tlaxotlalli in tlalli,
auh in itech tlachmatl, ontetl tlachtemalacatl manca,
in aquin ollamani oncan tlacalaquiya, oncan quicalaquiya olli:
niman ic quitlani in ixquich tlazohtli tlatquitl,
auh mochintin quintlani, in ixquichtin tetlatlattaque, in oncan tlachco,
itlahuicallo in olli, mayehuatl, nelpiloni, quecehuatl.
Patoa ica ayecotli, huehuey etl nauhtetl in tlaixcoyonilli
inic motlani immatica in quichayahua in nauhtetl etl,
Quicuiloa ce petlatl, tliltica, papatlactic in tlilli, inic mihcuiloa patolpetlatl,
in oncan mopouhtiuh tlapohualtetl matlactetl omome, chichicuacentetl
imaxca intlapohualteuh icecemme
in ixnamiqui in motlani in patoa, quitlanilia in ixquich tlazohtli,
coztic teocuitlacozcatl, chalchihuitl, teoxihuitl,
matzopetztli ipan ca chalchihuitl ololiuhqui anozo teoxihuitl.
Quetzalli, tlacotli, calli, milli, tlazotilmahtli, pepechtli, huehuey tilmahtli,
chalchiuhtentetl, teocuitlanacochtli, xomoihhuitilmahtli,
auh in aquin patoani, in quichayahua in etl, intla centetl etl ic teequechili,
in moquetzticaz etl, in ompa ic tzinmimiltic,
Cenca tetzammachoya, cenca tlamahuizolli ipan mottaya,
Niman muchi quitlani, in ixquich tlazohtli,
in motlanitoa in macanel ayamo ahci in quezquitetl aquilli,
inic netennonotzalo, inic netzopalo
Tlatlamina tlahuitoltica, tipontica, totomitica, tlacochtica,
Itlahuicallo, matzopetztli ipan ca, huey chalchihuitl, ololiuhqui
Anozo teoxihuitl in imaquechtlan quitlalia tlatoani
Tlatlacalhuazhuia, tlatlamotla ican tlacalhuaztli,
ihuicallo telolmatlatl, In oncan mopiya zoquitelolotli, ihuan tepozcocotli
Mimiltic inic mopetlahua telolotli ic quimotla tepitoton totomeh,
Tlatlapechmatlahuia in ica totomatlatl
Moxochimiltia, moxochitepantia, caquiya in ixquich nepapan xochitl
Oncatca intetlahuehuetzquiticahuan in quimellelquixtiaya In quicecemeltia,
ihuan cuahuilacatzoque in quipaquiltia miyec tlamantli
in intlachihual tehuetzquiti ihuan mahuiztic,
in ica ixocpal tlanipa inic tlamati ce tlacatl,
tomahuac in cuanmimilli in quitotia ica ixocpal aquetztoc
Ahcopa in conmayahui cuammimilli za yehuatl in ixocpal ic tlamati
Miyec tlamantli, in tececemelti in quichihua, oncatca imaachuan,
ixolhuan in quinhuicatinenca in quimehelelquixtiaya,
tzapame, huillame, tepotzome, teachme, quinpiyaya cuacuauhti,