Florentine

Book 8 of the Florentine Codex

Inic chicueyi amoxtli in techpa tlatoa in huehuei tlatoque ihuan in pipiltin

ihuan in quenin quipiyaya tlapepenaliztli in ipan tlatocayotl.

Chapter 1

Inic ce capitulo itechpa tlatoa in tlatoque ihuan in gobernadores

in otlatocatque mexico in ixquich ica ipeuhcan tlatocayotl

ihuan in ixquich ica xihuitl de 1560.

Inic ce mexico tlatoani.

Acamapichtli achto compehualti tlatocat in tenochtitlan

cempohualxihuitl oce ihuian yocoxca in catca,

ayatle yaoyotl ipan mochiuh.

Inic ome tenochtitlan tlatoani.

Huitzilihuitl ic ome tlatocat in tenochtitlan

cempohualxihuitl oce, yehuatl quipehualtih in yaoyotl,

quimpeuh in colhuacan tlaca.

Ic ei tenochtitlan tlatoani.

Chimalpopoca ic ei tlatocat in tenochtitlan matlacxihuitl.

Ic nahui tenochtitlan tlatoani.

Itzcoatzin ic nahui tlatocat in tenochtitlan matlacxihuitl onnahui

quimpeuh in azcapotzalca ihuan xochmilca

Inic macuilli tenochtitlan tlatoani.

Huehue motecozoma, ic macuilli tlatocat, in tenochtitlan:

cempohualxihuitl ipan matlacxihuitl,

quipeuh quiyaochiuh in ixquich chalcatl ihuan cuauhnahuac

ihuan in ixquich mocuauhnahuacaitoa ihuan mazahuacan,

ihuan ipan mochiuh in huei mayanaliztli,

nauhxihuitl in manca inic mitoa Ne-ce-tochhui-lo-c tepan

moyahuac in ixquich mexicatl ihuan tepanecatl, ihuan acolhuacatl.

Inic chicuacen, tenochtitlan tlatoani.

Axayaca ic chicuacen tlatocat in tenochtitlan: matlacxihuitl ipan nauhxihuitl.

Ipan mochiuh inic moyaochiuhque tlatilolca, ihuan tenochca:

inic moixnamique, oncan poliuh in tlatocayotl tlatilolco;

ompohualxihuitl ipan chicuacen xihuitl in aocac tlatocat tlatilolco.

Auh in icuac mochiuh yaoyotl:

tlatocatiya in tlatilolco, itoca moquihuixtli.

Auh in yehuatl axayaca, quipeuh in tlacotepec, ihuan callimaya, ihuan metepec,

calixtlahuaca, ecatepec, cozcacuauhtenanco, teotenanco,

malinaltenaco, tzinacantepec, coatepec, cuitlapilco, teoxahualco, tecualoya, ocuillan.

Inic chicome, tenochtitlan tlatoani.

Tizocicatzin, ic chicome tlatocat in tenochtitlan nauhxihuitl.

Atle ipan mochiuh in yaoyotl.

Inic chicuei, tenochtitlan tlatoani.

Ahuitzotl, ic chicuei tlatocat in tenochtitlan:

caxtolxihuitl ipan exihuitl. icuac tlatocati in apachiuh Mexico:

itencopa mochiuh, inic motlapo macuiltetl oztotl

in intoca Acuecuexatl, tlillatl, Huitzillatl Xochcaatl, coahatl,

in ma in coihuacan ihuan huitzilopochco:

oc nauhxihuitl quitztia, inic apachiuh mexico,

in ayamo miqui Ahuitzotl.

Auh in icuac huallaque Españoles,

ye iuh cempohualxihuitl omome, oapachiuh in mexico:

ihuan ipan mochiuh in tonatiuh cualoc,

nepantla tonatiuh: azo macuilli horas in tlayohuatimanca,

nezque in cicitlalti, cenca nemauhtiloc, mitoaya:

ca hualtemozque in tzitzimime, tecuazque:

ihuan quimpeuh in tziuhcoaca, ihuan mollanco, tlapan, chiyapan, xaltepec

Izoatlan, xochtlan, amaxtlan, mapachtepec, xoconochco, ayotlan, mazatlan, coihuacan.

Inic chicunahui, tlatoani tenochtitlan.

Motecozuma ic chicunahui tlatocat in tenochtitlan caxtolxihuitl ipan nauhxihuitl,

ipan mochiuh mayanaliztli

oxihuitl in manca in aocmo quiyahuia,

ic nohuiyan tepan cenman in mexicatl cenca netoliniloc in mayanaliztica.

Zan no yehuatl ipan mochiuh in oncan cuicacali catca in tenochtitlan,

cuicac ce nepantla tecoc in tlaelnapaloa,

queuh Hueya noqueztepole huel xomitotia, atlan tihuetztoz-e.

In mochiuh, i, ye iuh hualmachizti in Españoles,

Çan no yehuatl ipan mochiuh

cihuacoatl chocatinenca yohualtica,

mochi tlacatl quicaquia in chocayaquitoaya.

No nopilhuantzitzi ic zan ye namechnocahuilia.

Çan no yehuatl ipan mochiuh .

Çe tlacatl cihuatl ichan tenochtitlan mic ica cocoliztli,

niman motocac yithualco ipan quitemanque,

ye iuh nahuilhuitl motocac in cihuatl micqui mozcali yohualtica,

cenca tlamauhti in oncan motocaca tlatatacco motlapo,

auh in tetl ic motemanca huehca huehuetzito:

auh in yehuatl cihuatl ino iuh mozcali, niman quinonotzato,

quilhuito in motecozuma in tlein quittac quipohuili, quilhui.

Ca inic oninozcali nimitzilhuico.

Ca ye ixquich ca tehuatl moca tzonquiza in tlatocayotl in mexico

ca tehuatl mopan mantiaz in altepetl mexico.

Aquique in ye huitze ca yehuantin tlalmacehuaquihui,

yehuantin onozque in mexico:

auh in yehuatl micca cihuatl ye no cempohualxihuitl oce inen

ihuan occe quichiuh iconeuh oquichtli:

Ihuan miyec in altepetl quipeuh motecozuma in itoca, icpatepec,

cuezcomaixtlahuacan, zocollan, tecomaixtlahuacan, zacatepec, tlachquiyauhco, yolloxonecuillan, atepec, mictlantloapan, nopalan iztectlalocan, cuextlan, quetzaltepec, chichihualtatacalan.

Zan no yehuatl ipan mochiuh,

oc iuh chicuexihuitl aciquihui españoles mottaya netetzahuiloa,

in yohualtica hualmoquetzaya cenca tomahuac in tlanextli

iuhquin tlemiyahuatl, icehual tlanextiticaca tonatiuh iquizayampa

hualmoquetzaya ompolihuia in ye hualquiza tonatiuh,

nauhxihuitl in mochipa mottaya yohualtica

auh in icuac poliuh oc iuh nauhxihuitl

aciquihui in españoles ihuan ipan mochiuh inic ipan acico españoles

Inic cahcique inic quipeuhque Mexico in oncan axcan onoque Españoles

Ihuan in nohuiyan in nican yancuic España de mill e quiñientos i dezinhuehue.

Inic matlactli tenochtitlan tlatoani.

Cuitlahua, ic matlactli, tlatocat in tenochtitlan:

nappohualilhuitl o iuh acico in Españoles mexico.

Yehuatl ipan mochiuh in hualla huei cocoliztli,

i cenca ic michuac in nohuiyan altepetl ipan:

in itoca huei zahuatl, huei totomonaliztli;

in aic ceppa omottac in ma ic onecocoloc in mexico,

huel mochi tlacatl, quintlacalhui ini xayac:

inic quiquiztic, chachacuachtic mochiuh,

aocmo motocaya in mimicque, za mochi atlan quimontlazaya:

ca in icuac cenca nohuiyan atlan catca in mexico,

ihuan cenca tlayaxtimoma[n], inic ihyaxque mimicque.

Inic matlactli oce tenochtitlan tlatoani.

Cuauhtemoc, ic matlactli oce tlatocat in tenochtitlan:

nauhxihuitl, ipan mochiuh: inic yehuantin españoles quipeuhque,

cahcique in altepetl in mexico,

ihuan in nohuiyan ic quiyahualotoc ixquich altepetl,

icuac tlahtocati in huallaque, acico matlactin omomen teopixque,

in ipilhuan Sanct fracixco, in quitecahualtico tlateotoquiliztli:

ihuan quitemachtique tlaneltoquiliztli.

Inic matlactlomome, tenochtitlan tlatoani.

Don Andres, motelchiuh ic matlactli omome tlatocat in tenochtitlan:

exihuitl icpan españoles, nohuiyan yauquizato in cuextlan,

hudurax, auh in yehuatl nonom de gozman,

quihuicac in huei colhuacan ompa miquito.

Inic matlactli omei, tenochtitlan tlatoani.

Don pablo, xochiquen ic matlactli omei tlatocat in tenochtitlan: exihuitl.

inic matlactli onnahui tenochtitlan tlatoani.

Don Diego Huanitl, ic matlactli onnahui tlatocat in tenochtitlan: nauhxihuitl.

Inic caxtolli tenochtitlan tlatoani. Don Diego Tehuetzquiti,

ic caxtolli tlatocat in tenochtitlan: matlacxihuitl ipan exihuitl,

ipan mochiuh inic momanaco huei cocoliztli in itoca pextilencia

teyacacpa quiz eztli cenca ic micuac in nohuiyan

ihuan apizmicuac cenca miec in motocaya cemilhuitl in nohuiyan,

ihuan ipan mochiuh inic poliuhque, pehualoque chichimeca,

xochipilteca ihuan Scipola tlaca.

Inic caxtolli oce, tenochtitlan tlatoani.

Don xpohual cecepatic, ic caxtolli oce, tlatocat in tenochtitlan: nauhxihuitl.